Soltüstık Казахстан
Облыстық төтенше жағдайлар департаменті бастығының орынбасары Марат Қанғожинов, мемлекеттік өрт бақылау басқармасының бастығы Дмитрий Растихин өңірлік коммуникациялар қызметінде өткен брифингте қыс маусымы кезінде қызыл жалыннан сақтану шаралары және қар құрсауында қалғандарды құтқару туралы айтып берді.
Дмитрий Растихин өз сөзінде 2021-2022 жылғы жылыту маусымы басталғаннан бері облыста 195 өрт болғанын жеткізді. 12 адам “тілсіз жаудың” құрбаны болған. Түрлі дәрежеде дене жарақатын алғандардың саны – 13. 20 адам уланған. Келтірілген материалдық залал – 12 млн. теңге. Өткен аптаның ішінде 14 өрт фактісі тіркеліпті. Қызыл жалын қаупі туралы 90 мыңнан астам жадынама таратылған. Рейдтер кезінде 1952 үйде электр жабдықтары мен жылыту жүйелерін пайдалануда кемшіліктер бары анықталған. Қыс басталғаннан бері халықтың әлеуметтік осал топтарының үйлеріне 981 дабылқаққыш орнатылған.
Дмитрий Растихин адам өміріне қауіп төндіретін, соңы қайғылы оқиғаларға соқтыратын оқыс жағдайларды болдырмау, алдын алу үшін электр сымдары мен түрлі аспаптардың жарамдылығына ерекше назар аударуға, пеш жағылған үйлерді қараусыз қалдырмауға кеңес берді.
Департамент бастығының орынбасары Марат Қанғожиновтың айтуынша, қыста тұрғындардың қауіпсіздігін қамтамасыз ету шаралары күнібұрын ойластырылған. Дауылды ескертулер, автомобиль жолдарындағы қозғалыстың жабылуы немесе шектелуі жайлы ұялы телефондарға хабарлама жіберіледі, “Дәрмен” мобильді қосымшасы, әлеуметтік желілер мен бұқаралық ақпарат құралдары арқылы да хабарланады. Биыл 54 дауылды ескерту жарияланды. Автожолдардағы қозғалыстарға 12 рет шектеу қойылған. Алайда тұрғындар арасында бұл ескертулерді елей бермейтіндер бар. Жедел іздестіру шараларының нәтижесінде 13 техника, 38 адам құтқарылды. Жалпы өңір бойынша ауа райы күрт бұзылған жағдайда қосымша 39 техника, 14 мобильді іздеу тобы көмектесуге әзір.
– “Қазгидрометтің” болжамы бойынша ақпан айында бұрқасын болып, температура айтарлықтай төмендеуі мүмкін, көктайғақ болады. Осыған байланысты қауіпсіздік шараларын сақтау аса маңызды. Су айдындарында қауіпсіздік ережелерін елемеу салдарынан қысқы кезеңде 4 адам суға кеткенін айта кеткен жөн, – деді Марат Қанғожинов.
Әділет БАҒЛАНҰЛЫ,
“Soltüstık Qazaqstan”.