Soltüstık Казахстан
Жетінші шақырылымдағы облыстық мәслихаттың кезекті он бесінші сессиясы өтті. Депутаттар жиналысында өңірдің елді мекендерін ауызсумен қамтамасыз ету туралы энергетика және тұрғын үй-коммуналдық шаруашылығы басқармасының басшысы Бақыт Ілиясовтың есебі тыңдалды. Баяндамашы депутаттарды елді мекендерге су беру жағдайымен таныстырып, проблемалық мәселелер және оларды шешу бойынша жүргізіліп жатқан жұмыстар туралы айтып берді. Қазіргі уақытта 250 мың адам тұратын (83,5 пайыз) 406 ауыл орталықтандырылған ауызсумен қамтамасыз етілген. 229 ауылдық елді мекен (16,5 пайыз) әлі құбырға қосылмаған. Былтыр бұл салаға 10,3 млрд. теңге бағытталып, 49 елді мекенге тіршілік көзі жеткізілді. Жамбыл, Мамлют аудандарының бірнеше ауылына тарату желілері мен су құбырлары тартылды. Айыртау, Ақжар, Есіл, Жамбыл, Мағжан Жұмабаев, Қызылжар, Мамлют, Тимирязев, Уәлиханов, Шал ақын және Ғабит Мүсірепов атындағы аудандарда ауызсумен жабдықтау желілері қалпына келтірілді. 2021 жылдың соңында ауыл тұрғындарының сумен жабдықтауға қолжетімділігі 83,5 пайызды құрады. Биыл сумен жабдықтау және су бұру объектілерін салуға, жаңартуға және жөндеуге 12,3 млрд. теңге бөлінген.
Денсаулық сақтау басқармасының басшысы Нұрлан Айманов облыстың медицина саласындағы ахуал жөнінде айтып берді. Қазіргі таңда өңірде 19 аурухана, 63 амбулаторлық-емханалық ұйым, 42 фельдшерлік-акушерлік және 413 медициналық пункт жұмыс істейді. Өкінішке қарай, 2020 жылмен салыстырғанда дәрігерлермен қамту көрсеткіші 2 пайызға төмендеген. Емдеу мекемелеріне әлі де 285 дәрігер жетіспейді. Жергілікті бюджет қаражаты есебінен 9 жоғары медициналық оқу орнында 146 студент оқиды.
Санитарлық-эпидемиологиялық бақылау департаментінің басшысы Әсет Жұматаев облыста эпидемиологиялық жағдайдың тұрақты екенін жеткізсе, экономика басқармасының басшысы Қуанышбек Қалижанов жергілікті мемлекеттік-жекешелік әріптестік жобаларын іске асыру барысы туралы хабардар етті. Оның айтуынша, 76 жоба жүзеге асырылуда: 35-і – білім беру, 3-уі – денсаулық сақтау, 2-уі – спорт салаларында.
Облыстық бюджетті нақтылау бойынша мәслихат шешіміне өзгерістер енгізу туралы қаржы басқармасының басшысы Наталья Дышкант сөз сөйледі.
Сессияда мәдениет және білім беру нысандарына тұлғалардың есімдерін беру мәселесі қаралып, Жамбыл ауданының орталықтандырылған кітапханалар жүйесіне Сафуан Шаймерденовтің, Шал ақын ауданындағы қазақ орта мектебіне Кәкімбек Салықовтың, Қызылжар ауданы Новоникольск орта мектебіне Геннадий Зенченконың есімдерін беру туралы ұсыныстар қолдау тапты.
Айыртау және Шал ақын аудандары бойынша әлеуметтік маңызы бар автобус бағыттарының тізімі бекітілді. Ауылдардан облыс орталығына дейін және аудан ішіндегі жол жүру құны екі есеге төмендемек. Жаңа тізбеде барлығы 126 бағыт бар, оның 42-сі – облысішілік, 44-і – қалалық және қала маңындағы, 40-ы ауданішілік бағыттар.
Жаңа кадрлық тағайындауларға байланысты облыс әкімі жанындағы бірқатар комиссиялардың дербес құрамы туралы шешімдерге өзгерістер енгізіліп, өңір басшысының халықпен кездесуінің жылдық жоспары келісілді.
Қайрат САДЫҚОВ,
облыстық мәслихаттың баспасөз хатшысы.