Soltüstık Казахстан
Жүз жылдан астам тарихы бар қасиетті қарашаңырақ – “Soltústik Qazaqstan” газеті ұжымының өңірімізге алыстан ат арытып келген белгілі тұлғаларды мейман ететін игі дәстүрі бар. Редакциямызға есімі елімізге белгілі ақын, Қазақстан Жазушылар одағы басқарма төрағасының бірінші орынбасары Ақберен Елгезек келіп, ұжым мүшелерімен кездесті. “Қызылжар-Ақпарат” жауапкершілігі шектеулі серіктестігінің директоры Жарасбай Сүлейменов мейманды ұжымға таныстырып, алаш ардақтыларының қолтаңбасы қалған басылымның бүгінгі тіршілік-тынысы жайлы айтып берді.
Ақберен Елгезек терең де мағыналы өлеңдерімен қазіргі қазақ поэзиясының, соның ішінде философиялық жанрдың дамуына ерекше үлес қосып келеді. Қазақ әдебиетінің қоржынына олжа салған аға буын өкілдері оны “поэзияға келген құбылыс” деп те бағалаған.
Алматылық мейман халқымыздың небір арыстарының айшықты іздері сайрап жатқан облыстық “Soltüstık Qazaqstan” газетінің ұжымымен танысқанына қуанышты екенін жеткізіп, Қазақстан Жазушылар одағының жұмысы, алдағы жоспарлары жайлы айтып берді. Сонымен қатар ақынның газет-журнал, кітап оқудың, “Болмаған балалық шақ” шығармасының жазылу тарихы, қазіргі қазақ әдебиетінің жай-күйі, жас қаламгерлердің ізденістері жайлы айтқан әсерлі әңгімесін журналистер қауымы ерекше қызығушылықпен тыңдап, көкейлеріндегі сұрақтарын қоя алды.
Ақынмен болған сұхбаттың толық нұсқасын газетіміздің алдағы сандарында жариялайтын боламыз.
Нұргүл ОҚАШЕВА,
“Soltüstık Qazaqstan”.
Суретті түсірген
Талғат ТӘНІБАЕВ.