Soltüstık Казахстан
Көрнекті ақын, журналист, қоғам қайраткері Ғалым Малдыбаевтың туғанына 120 жыл толуына орай “Жыршыл жүрек” атты поэзия кеші өтті. Сәбит Мұқанов атындағы облыстық ғылыми-әмбебап кітапханада ұйымдастырылған шараға ақынның жерлестері, замандастары, шәкірттері қатысып, тұлғаның өмір жолынан сыр шертетін әдемі естеліктер айтты.
Кеш шымылдығын М.Қозыбаев атындағы Солтүстік Қазақстан университетінің студенті Дияс Аяған өзінің арнау өлеңімен ашты. Одан соң өңірімізге белгілі қоғам қайраткерлері мен жазушыларға сөз кезегі берілді.
– Ғалым ағамыз ақын, жазушы, журналист, бір сөзбен айтқанда сан қырлы азамат болған. Оның өмірі мен шығармашылығы кімге болмасын өнеге. Ол – қазақ әдебиетінің дамуына ғана үлес қосқан жоқ, қазақ баспасөзіне де ерекше еңбек еткен азамат. Қарашаңырақ – облыстық “Soltüstık Qazaqstan” газетіне де көп еңбек сіңірген. Осында болып жатқан түрлі оқиғалардың ортасында жүрді. Сонау алмағайып, аласапыран заманда қазақ баспасөзінің дамуына айрықша үлес қосып, облысымыз ғана емес, республиканың түкпір-түкпірінде газеттердің ашылуына бір кісідей ықпал етті. Сөйте жүріп сол өңірдегі талантты азаматтарды іздеп, тауып, олардың өнер жолына түсуіне ұйытқы болды, – деді алғашқы болып сөз алған “Қызылжар-Ақпарат” жауапкершілігі шектеулі серіктестігінің директоры Жарасбай Сүлейменов.
Кеш барысы Ғалым Малдыбаев туралы әдемі естеліктермен өріліп, жыр сүйер жастар ақынның отты жырларын мәнерлеп оқыды.
Қазақ әдебиетінде өзіндік орны бар, облысымызға ғана емес, республикаға аты мәлім тұлғаның өмірі мен шығармашылығы – бүгінгі ұрпақ үшін рухани азық, құнды тәрбие. Ғалым Малдыбаев 1902 жылы Шал ақын ауданының Жаңажол ауылында дүние есігін ашқан. Ол тұтастай өмірінде “Қырым қызы” сынды поэмалар мен жырлар жазып, қоғамның тыныс-тіршілігін өлеңге арқау ете білді. Сөйтіп, халқына сүбелі дүниелерді тарту етті.
Бектұрған ЛАҚАДЫЛ,
“Soltüstık Qazaqstan”.
Суретті түсірген
Талғат ТӘНІБАЕВ.