Soltüstık Казахстан
М.Қозыбаев атындағы Солтүстік Қазақстан университеті мемлекеттен қосымша 800 грант сұрап, алдағы оқу жылы барлығы 2 мың түлекті тегін оқытуды көздеп отыр. Қосымша оқу орындары негізінен, журналистика, құқықтану, дизайнер мамандығын таңдаған түлектерге бөлінбек.
– Өткен жылғы қыркүйек айынан бастап, Аризона университетімен бірлескен жаңа білім беру бағдарламалары ашылды. Ауыл шаруашылығы бағытында – 3, ІТ-технология және педагогикалық биотехнология саласында бірқатар мамандықтар пайда болды. Қазір екідипломдық халықаралық бағдарлама бойынша студенттер білім алып жатыр. Ауыл шаруашылығы бағытындағы мамандықтарға көп көңіл бөлінуде, – дейді университеттің агрономия және орман шаруашылығы кафедрасының меңгерушісі Фариза Мұқанова.
Жалпы жыл сайын аталмыш университетке бөлінетін гранттардың саны артуда. Өткен жылы студенттерге жалпы 1000 грант берілсе, биылғы көрсеткіш 1200-ді құрамақ. Қосымша 800 грант бөлінген жағдайда өңірде кадр жетіспейтін салалардың тамырына қан жүгірер еді.
Оқу орнында ауыл шаруашылығы саласын дамыту бойынша біршама іс қолға алынғанын да атап өткен жөн. Оның ең ауқымды әрі ерекшесі – шетелдік тәжірибе. Білім алушылар 6 ай көлемінде Германиядағы ірі экологиялық таза өнім өндірумен айналысатын компанияларда өндірістік тәжірибеден өтеді.
– 2019 жылы алғаш рет республика бойынша 40 білім алушы Польшада өндірістік тәжірибеден өтіп келді. Ол да жарты жылға созылады. Биылғы жылы бұл жұмыс жанданды. Көктемде 30 студентті жіберуді жоспарлап отырмыз, – дейді Фариза Мұқанова.
Аманжол НҰРТАЗИН,
“Soltüstık Qazaqstan”.