Soltüstık Казахстан
“Enactus Kazakhstan “Winter camp 2023” көшбасшылық және кәсіпкерлік мобильді мектебінің 13-ші маусымы еліміздің түкпір-түкпіріндегі қатысушылардың басын қосты. Шара Алматы облысындағы “Тау Тұран” оқу-сауықтыру кешенінде өтті. Лагерге еліміздің 18 жоғары оқу орны мен колледждерінің білім алушылары барды, олардың қатарында М. Қозыбаев атындағы Солтүстік Қазақстан университетінің “Enactus Kozybayev” командасы да бар.
10-15 қаңтар аралығында олар қаржылық сауаттылық және тұрақты даму мақсаттары бойынша оқытылды. Талапкерлер Қазақстанның тарихы мен мәдениеті жан-жақты сөз болған дәрістерді тыңдады. Сонымен қатар интерактивті сессиялар, командалық жұмыс, тақырыптық кештер өткізілді.
Шараның соңында үздік өрендерге түрлі аталымдар бойынша жүлделі орындар табыс етілді. Мұндай марапаттардан СҚУ студенттері де құр қол қалмады. “Үздік эссе” аталымында Айзат Елубаева топ жарса, Алдияр Ерсайын “Үздік косплей” атанды. “Mr&Mrs Winter Camp 2023” аталымында 2-орынға Мейіргүл Нұржан табан тіреді. Олар мақтау қағаздарымен және кітаптармен, басқа да бағалы сыйлықтармен марапатталды. Бұл бизнес-лагердің қатысушыларына қосымша білім алуға және кәсіппен айналысуға көмектеседі.
“Enactus” халықаралық жобасы студенттер мен жастар арасында көшбасшылық пен кәсіпкерлікті насихаттайды. “Enactus Қазақстан” ұлттық кеңсесі университет командаларының қызметін үйлестіреді және кәсіпкерлердің студенттік қоғамдастығын дамытады. Қатысушылар қоғам өмірін жақсартуға мүмкіндік беретін әлеуметтік-экономикалық идеяларды жүзеге асырады. Олар өз жобаларын жыл сайын бизнес жетекшілер бағалайтын байқауларға жібереді.
Диана ХАЛИМОВА,
М.Қозыбаев атындағы СҚУ медиаорталығының бас редакторы.