Soltüstık Казахстан
Ақан сері атындағы облыстық филармонияның сахнасында Еркеғали Рахмадиев атындағы Мемлекеттік академиялық филармонияның үрмелі аспаптар оркестрі мен камералық хоры “GAME EVOLUTION VOL.2” атты концерт қойды.
Астаналық өнерпаздар теріскейдің өнерсүйер қауымын ерекше әуендерімен тамсандырды. Концерттік бағдарлама 1990 жылдардан бүгінгі уақыт аралығында жарыққа шыққан танымал компьютерлік ойын саундтректерінен тұрады. Әуесқой ойыншылар әдеттегідей монитор алдындағы креслода емес, концерт залында отырып, таныс әуендерді тыңдай алды.
Әсерлі кеште жастарға жақсы таныс “Dota-2”, “Sonic”, “PUBG”, “Ori and the blind forest”, “Street fighter”, “Assassin’s Creed 2”, “Undertale”, “The last of Us”, “Doom 2”, “GTА” ойындарынан танымал әуендер хор мен оркестр үшін арнайы жазылған әдеттен тыс аранжировкада орындалды.
Оркестрдің көркемдік жетекшісінің айтуынша, компьютерлік ойындардың әуенін адам оңай қабылдайды. Іс-шараның басты мақсаты – өскелең ұрпақтың музыкаға деген қызығушылығын арттыру.
Елордалық шығармашылық ұжым Петропавлға алғаш рет келіп отыр. Олардың өнерін солтүстікқазақстандықтар ерекше ықыласпен тыңдады.
Қос ұжым Қызылжарға мамыр айында тағы бір рет келмек. Онда елордалық меймандар солтүстікқазақстандықтарға су жаңа бағдарлама ұсынбақ.