Soltüstık Казахстан
Әлемдегі танымал спорт түрлерінің бірі – үлкен теннис. Соңғы уақытта қазақстандық спортшылар да биік шыңдарды бағындыруда. Елена Рыбакина былтыр үлкен дулыға турнирінде жеңіске жетіп, айды аспаннан бірақ шығарған болатын. Ол биыл да сәтті өнер көрсетуде, Австралия ашық біріншілігінің финалына шықты. Алайда ерлер арасында жарқ етіп шыққан жарық жұлдыз жоқтың қасы, дегенмен соңғы уақытта Петропавлдың тумасы Тимофей Скатовтың аяқалысы қуантып жүр.
Ел арасында үлкен теннис пен гольф – байманаптар мен ауқатты адамдардың айналысатын спорты деген түсінік қалыптасқан. Сондықтан да бұл спорт түрлерімен шұғылданатындардың саны аз. Соңғы жылдары ғана теннис үйірмелері көбейіп, спорт секцияларына баратын жастардың қатары қалыңдады. Елімізде теннис корттары көптеп салына бастады. Қазақстан теннис федерациясы басшылығының қолдауымен Петропавл қаласында да заманауи орталық ашылғаны белгілі.
Соңғы жылдары қазақстандық теннисшілер халықаралық аренада үздіктер қатарынан көрінуде. Солардың арасында еліміздің екінші ракеткасы, ал әлемдік рейтингте 144-і орында тұрған Тимофей Скатовтың жетістіктері қуантарлық. Ол 2001 жылдың 21 қаңтарында Петропавл қаласында дүниеге келіп, бір жасқа келгенде ата-анасы Ресейдің Тула қаласына көшіп кетеді. Болашақ спортшы бес жасқа толар-толмастан үлкен теннис үйірмесіне барады. Жалпы Скатовтар отбасы спортқа жақын екенін айта кеткен жөн. Тимофейдің әкесі мен ағасы футбол ойнаса, анасы кезінде шаңғы спортымен айналысқан екен. Бастапқыда әкесі кіші ұлы Тимофейді де футболға бергісі келген. Бірақ ұлының жасы тым кіші болғандықтан, теннис спортына бере тұруды ұйғарған. Осылайша ол жас жаттықтырушы Андрей Уаповтың тобына түсіп, алғашқы күннен тенниске икемі барын байқатқан.
Тимофей Скатов өзінің алғашқы турнирін сегіз жасында, 2009 жылы Ресейдің Сочи қаласында өткізген болатын. 2013 жылдан бастап Еуропалық деңгейдегі турнирлерде ойнай бастады. Әрине, алғашында барлығы спортшының қалағанындай болмаса да, тынымсыз жаттығу мен төккен тердің арқасында жас теннисші біртіндеп жетістіктерге қол жеткізе бастайды. 15 жасқа толғанға дейін ірі 14 турнирге қатысқан ол жетеуінде бірінші орын алса, төртеуінде жүлдегер атанған.
Сонымен қатар жеткіншек командалық жарыста Ресей біріншілігінде алтын және жекелей сында қола жүлдеге ие болғанын да айта кеткен жөн. 2015 жылдың қазан айының соңында 15 жасқа дейінгі теннисшілер арасында Ресейдің Саранск қаласында өткен ел кубогында жалғыз өзі және жұптық сында Раил Ибрагимовпен бірге ойнап, абсолютті чемпион атанды. 2016 жылы көрші елдің құрамасы сапында жасөспірімдер арасындағы Дэвис кубогында топ жарса, 2017 жылы жасөспірімдер арасындағы “US Open” турнирінде жартылай финалға дейін жеткен.
“Ит – тойған жеріне, ер – туған жеріне” дегендей, Тимофей 2018 жылдың мамыр айында кіндік қаны тамған Қазақстанға оралып, азаматтық алды. Содан бері халықаралық аренада ел намысын абыроймен қорғап жүр. Туған жерге оралған кезде 17 жасқа енді толған спортшы Францияның ашық чемпионаты “Roland Garros” турниріне алғаш рет Қазақстанның атынан қатысқанын айта кеткен жөн. “Қазақстандық теннисші жастайынан көзге түсіп жүр. Болашағы жарқын болуы мүмкін”, – деген болжамды әлемнің білікті мамандары жиі айтады. Оған негіз де жоқ емес.
Өткен жылдың қорытындысы бойынша, жерлесіміз “ATP Challenger” турнирлеріне қатысқан теннисшілер арасында “Жыл жаңалығы” деп танылды. Кәсіби теннисшілер қауымдастығы оны 2022 жылы өзін жақсы қырынан көрсеткен бес ойыншының қатарына қосқан. Былтыр Италияның Парма қаласында өткен турнирде 21 жастағы жерлесіміз чемпион атанған болатын. Ол финалда осыған дейін тоғыз матч қатарынан жеңіске жеткен словакиялық Юзек Коваликті ұтып кеткен еді. Сондай-ақ өткен жылы ол Кокимбо, Лиссабон, Брага, Севилья, Розето-делья-Абруцци додаларында жартылай финалға дейін жеткен болатын. Қыркүйек пен қазан аралығында петропавлдық теннисші 16 ойын өткізіп,14-інде жеңіске жетті. Ал “Coquimbo Challenger” жарысында дүниежүзілік рейтингте өзінен әлдеқайда жоғары тұрған, яғни әлемнің 71-ші ракеткасы Федерико Корианы тізе бүктірді.
Қазіргі таңда спортшы Чилидің Консепсьон қаласындағы челленджер жарысында өнер көрсетіп жатқанын айта кеткен жөн. Жақында дүниежүзілік рейтингте 166-орында тұрған тайбэйлік Вун-Лин Вуді тартысты матчта ұтып, жарыстың екінші айналымына шықты. Енді жерлесіміз ширек финалға шығу үшін әлемнің 260-ракеткасы, колумбиялық Николас Мехиямен ойнайды.
Әділет БАҒЛАНҰЛЫ,
“Soltüstık Qazaqstan”.