Soltüstık Казахстан
Облыстық төтенше жағдайлар департаментінің бастығы Рамиль Камалов бірқатар аудандарды аралап, су тасқынына қарсы жүргізіліп жатқан іс-шаралардың барысымен танысты.
Өңірімізде су басу қаупі жоғары 85 елді мекен бар. Төтенше жағдайды болдырмау үшін құтқарушылар сақтық шараларын қолға алған. Ведомство бастығы алдымен Шал ақын ауданындағы жергілікті атқарушы билік өкілдерімен, су тасқынына қарсы іс-шараларды өткізуге жауапты азаматтармен кездесті.
Былтыр Шал ақын ауданында бірлескен әрі жедел әрекеттердің арқасында табиғи апаттарға, тұрғын үйлерді су басуға жол берілмеді.
– Ауданда су басу қаупі жоғары елді мекендердің саны – бесеу. Олар – Сергеевка қаласы, Городецкий, Мерген, Ақанбарақ және Новопокровка ауылдары. Бұл аумақта шамамен 114 тұрғын үй бар, онда 322 адам тұрады, – деді Рамиль Камалов.
Өңірдің бас құтқарушысы Шал ақын ауданының елді мекендеріне барып, жоспарлы жұмыстардың жүргізілгеніне көз жеткізді. Биыл Сергеев су торабының бақылау алаңына жақын жердегі жағалауды нығайту жұмыстары жүргізілгенін атап өткен жөн. Кіші Тораңғұл көлінде ұзындығы 500 метр, Новопокровка ауылының жанында диаметрі 1 метр, Сергеевка қаласынан 7 километр және Ибраев ауылына жақын 2 километр жергілікті маңызы бар “Көктерек – Ибраево” автомобиль жолына екі су өткізу құбыры орнатылды.
Департамент бастығы Ақжар, Аққайың, Тайынша, Тимирязево, Есіл және Уәлиханов аудандарында болып, жергілікті атқарушы органдар жүргізген су тасқынына қарсы іс-шаралардың сапасын тексеріп, елді мекендерді су тасқынынан тиімді қорғау жөнінде ұсыныстар айтты.
Аманжол НҰРТАЗИН,
“Soltüstık Qazaqstan”.