Soltüstık Казахстан
Орталық сайлау комиссиясы 19 наурызда өткен Парламент Мәжілісі депутаттарының сайлауында дауыс берудің алдын ала нәтижелерін жариялады. Өңірлерден алынған жедел деректер бойынша сайлаушылар тізіміне 12035578 адам енгізіліп, барлық сайлау учаскелеріне 6366441 ел азаматы келіп, өз таңдауын жасаған.
Облыстар мен республикалық маңызы бар қалалардың сайлау учаскелері берген алдын ала нәтижелер бойынша Парламент Мәжілісіне 6 партия өтті. Атап айтқанда, “Amanat” партиясы сайлаушылардың 53,9 пайыз дауысын жинаса, “Ауыл” халықтық-демократиялық патриоттық партиясы – 10,9, “Respublica” партиясы – 8,59, “Ақ жол” демократиялық партиясы-8,41, Қазақстан халық партиясы – 6,8, Жалпыұлттық социал-демократиялық партиясы – 5,20, “Байтақ” жасылдар партиясы 2,3 пайыз электорат сеніміне ие болды.
Дауыс беру күні 80 мыңнан аса ұлттық байқаушы сайлау барысын бақылады. Оның ішінде, кандидаттардың сенім білдірген 38000 өкілі, саяси партиялардан – 19036, акредиттелген 252 қоғамдық бірлестіктердің атынан келген 23383 байқаушы бар. Бұдан бөлек, сайлау барысын бақылауға халықаралық ұйымдардың 793 байқаушысы қатысты.
Сондай-ақ сайлауға мажоритарлық жүйемен қатысқан кандидаттарға дауыс берудің де алдын ала нәтижелері белгілі болды. Облыстар бойынша анықталған дауыс санына қарай жоғары пайыз жинаған үміткерлер алғаш рет баламалы мажоритарлық жүйемен сайланатын Парламент Мәжілісінің депутаттары атанады. Орталық сайлау комиссиясы таратқан алдын ала нәтижелерге қарағанда Солтүстік Қазақстан облысындағы №24 сайлау округі бойынша сайлауға түскен Орынбай Атығаев – 6297 дауыс, Бауыржан Есмұқанов – 3597 дауыс, Олег Иванов – 24436 дауыс, Денис Кривошеев – 19487 дауыс, Руслан Қайырбеков – 5121 дауыс, Еркебұлан Мамбетов 153736 дауыс, Кәрібай Мұсырман – 4452 дауыс, Мұхтар Серікбаев – 5785 дауыс, Иван Турков – 4151 дауыс, Омари Харбедия – 3656 дауыс жинады. Дауыс беруге қатысқан сайлаушылардың саны – 250443. Кандидаттардың бәріне қарсы 10529 дауыс берілді.
Осылайша №24 сайлау округінен сайлаушылардың басым дауысына ие болған “Мәмбетов және К” командиттік серіктестігінің бас директоры Еркебұлан Нұрмағамбетұлы Мәмбетов айқын жеңіске жетті.
Өмір ЕСҚАЛИ,
“Soltüstık Qazaqstan”.