Soltüstık Казахстан
Өңірдің шағын өзендері мен Сергеев су қоймасында ернеуінен тасып төгілген судың деңгейі аздап түсе бастады. Ал бөгеттен төмен орналасқан гидрологиялық бекеттерде керісінше, су көтеріліп келеді.
Сергеев су қоймасы 5 сәуірден бастап тасып, 8 сәуір күні ең жоғары көрсеткіш тіркелген болатын. Бұл күні судың тиісті деңгейден биіктігі 196 сантиметрге жетті.
“Қазгидромет” республикалық мемлекеттік кәсіпорны облыстық филиалының мәліметінше, қазіргі уақытта қоймадағы судың биіктігі – 145 сантиметр. Есіл өзенінің салаларында су деңгейі төмендегенімен, гидрологиялық бекеттердегі жағдай алаңдатуда. Есіл ауданындағы Покровка елді мекенінің маңында су деңгейі бір тәулікте 139, Қызылжар ауданының Новоникольское ауылының қасында 275 сантиметрге көтерілген.
Тасқын су облыс орталығына жақындап қалды. Петропавл су қоймасындағы бекітпелерді ашқаннан кейін қала маңындағы гидробекетте бір тәулікте су деңгейі 136 сантиметрге жоғарылады.
Ақерке ДӘУРЕНБЕКҚЫЗЫ,
“Soltüstık Qazaqstan”.