АУЫЛДАҒЫ АҒАЙЫНҒА ЖАЙЛЫ ЖАҒДАЙ КЕРЕК

Облыс әкімі Айдарбек Сапаров жұмыс сапарымен Есіл және Қызылжар аудандарына барып, ауылдардың ахуалымен, шаруашылықтардың жұмысымен танысып, тұрғындармен кездесті.

Есіл ауданында орналасқан “Атамекен Агро Корнеевка” жауап­кершілігі шектеулі серіктестігі 1350 бас сиырға арналған тауарлы-сүт фер­масын салып жатыр. Жобаның құны – 11,5 млрд. теңге. Жылдық қуаттылығы – 6000 тонна. “Орайын тапқанға мал шаруашылығы да – табысты сала. Мемлекет тарапынан қолдау көп, ең бастысы, сүт өнімде­ріне сұраныс мол”, – деген өңір басшысы агроқұрылым жетекшіле­рімен кездесіп, егіс науқанына да­йындық барысын сұрады.

Егіс кезінде өрт қауіп­сіздігін сақтау маңызды. Әкім Волошинка ауылдық округінде өрт сөндіру бекетінің жұмысымен та­нысты. “Пушкинское” ЖШС-ның дирек­то­ры Николай Козленко серіктестіктің екі өрт сөндіру машинасы бар екенін айтты. Қажет болған жағдайда көр­шілес аудандар мен елді мекен тұр­ғындарына да көмек көрсетеді. Дә­рігерлік амбулатория талапқа сай жабдықталған. Серіктестіктің қара­жа­ты есебінен 11 млн. теңгеге жөн­деліпті. Кадр тапшылығы жоқ. Меди­циналық қызметпен жақын маңдағы елді мекендер де қамтылған. Облыс әкіміне медициналық қызметтерді кеңейту, тіс емдеу кабинетін ашу, күндізгі стационарға арналған кереуеттер санын көбейту жөнінде өтініштер айтылды. Тұрғындармен жүздес­кенде су желісі мен жолдарды қал­пына келтіру, ауыл шаруашылығын дамыту, несие беру, жолаушылар та­сымалын ұйымдастыру мәселелері де талқыланды.

Мәдениет үйінде тұрғындар ал­дында есеп берген ауылдық округ әкімі Виталий Кочергин атқарылған іс-шаралармен қатар алдағы жос­парларын да баяндады. Округ құрамындағы үш ауылда 915 адам тұрады. Олардың дені 4 ауыл ша­руашылығы құрылымында жұмыс істейді. “Пушкинское” жауапкерші­лігі шектеулі серіктестігі – округтегі ең ірі серіктестік. 18 мың гектар егістік алқабы бар, тұрақты жұмысқа 162 адам тартылған. Орташа еңбекақы – 215 мың теңге.

“Ауыл аманаты” бағдарламасы аясында асылтұқымды ірі қара әкелу жөнінде екі жоба жүзеге асы­рылмақ. “Бизнес бастау” жобасы аясында да екі тұрғын кәсіпкерлік негіздерін оқуға өтінім берген. Ағаш өңдеу бойынша екі жобаны іске қосу жоспарланған.

– Бюджет есебінен Ивано-Петровка ауылында 18 млн. теңгеге спорт кешені және 1,2 млн. теңгеге балалар ойын алаңы орна­тылды. Волошинкада ауылішілік жолдарды орташа жөндеуге жоба­лық-сметалық құжат дайындалды. Мемлекеттік-жекешелік әріптестік шеңберінде жалпы сомасы 8 млн. теңгеге инертті материалдар сатып алынды. Осы жұмыстарды атқаруға аудандық бюджеттен 7 млн. теңге бөлінді, – деді ауылдық округ әкімі Виталий Кочергин.

Жиында жайылымдар мен ша­бындықтардың жетіспейтіндігі айтылды, тұрғындар интернет пен ұялы байла­ныстың сапасыздығына шағым­дан­ды. Ауылдық округ аумағында 2500 га жайылым бар екен. Бұл мә­селе шешілетінін айтқан өңір бас­шы­сы аудан әкіміне интернет пен ұялы байланыс мәселесін қысқа мерзімде шешуді тапсырды. Сонымен қатар ауыл шаруашылығы құрылымдарының басшыларына жем­шөп дақылдарының көлемін ұл­ғайтудың маңыздылығына тоқ­талды.

– Жергілікті тұрғындарды тұрақты жұмыспен қамтамасыз ету үшін сүт фермаларын салу қажет. Жаңа үй­лер салғанда суға дейін тартып беру керек. Кей шаруа қожалықтары осы әдісті қолдана бастады, – деді Айдар­бек Сейпілұлы.

“Пушкинское” және “Дальное” ЖШС-ның басшылары Николай Коз­ленко мен Николай Плетнев мемлекеттік-жекешелік әріптестік және биз­нестің әлеуметтік жауапкершілігі шеңберінде атқарып жатқан жұмыс­тары жайлы баяндады. Ал аудан әкімі Медет Оспанов сапалы ауыз-суға байланысты туындаған сауалдарға жауап берді. Сметалық құны 5,8 млрд. теңге болатын “Преснов су құбырын қайта жаңарту” жобасы аясында 13 ауылға, оның ішінде Волошинка және Ивано-Петровкаға су тарту жоспарланған.

Өңір басшысы кездесуді қоры­тын­дылай келіп, агроқұрылым иелеріне әлеуметтік жауапкершілікті күшейтуге, адамдарды жыл бойы тұ­рақты жұмыспен қамтып, лайықты еңбекақы төлеу керектігін айтты. Ауылдағы ағайынға жайлы жағдай жасалса, көптеген мәселелер өздігі­нен шешіледі. Мемлекет инфрақұ­рылымды жаңғыртуға көмектесіп, ауыл шаруашы­лығы құрылымдарын қолдауға әзір.

Осы күні облыс әкімі Айдарбек Сапаров Қызылжар ауданына барды. Жұмыс сапары барысында Архангельск ауылдық округінің тұр­ғын­дарымен кездесіп, өтініш-тілектерін мұқият тыңдады. Түйткілді проблемалардың бірқатары сол жерде шешімін тапты.

Округ құрамындағы екі ауылда 8 кәсіпкер егін егумен, көкөніс өсіру­мен, мал шаруашылығымен айна­лысады. Мәселен, “Ер Агро” ЖШС-ы 3860 гектарға егін егіп, 400-ге жуық ірі қара өсіреді. Шаруашылық директоры Анато­лий Шушамоин орташа еңбекақы – 187 мың теңге екенін айтты. Жыл қорытындысы бойынша сыйақы төленеді. Биыл еңбекақыны 220 мың теңгеге дейін көбейту көзделген. Былтыр астық өнімділігі 16,6 центнерге жетіпті. 84362 млн. теңге жеңілдікті субсидия рәсімде­ліп, бюджетке 28416 млн. теңге са­лық төленген. Тұрақты түрде еңбек ететін жұмысшылардың саны – 37.

Ауылдықтар жолдың жайын, ауызсудың тапшылығын, қоғамдық көліктің жоқтығын айтып шағым­данды. Тұрғындарды облыс орта­лығы түгілі Бескөлге жеткізер қо­ғамдық көліктің жоқтығы назалан­дырады. Облыс, аудан орталығынан дәрі-дәрмек пен азық-түлік алу үшін жаяулап-жалпылап күре жолға шығып, көлік тоқтатуға мәжбүр.

– Ауданның әр ауылына тұрақты көлік қатынасын ашу қажет. 1 шілдеден бастап бұл елді мекенге автобус қатынауы тиіс, – де­ген Айдарбек Сейпілұлы шаруа­шылықтарға бірлесіп, “Газель” көлі­гін сатып алуды ұсынды. Ал мемлекет өз кезегінде шығынның бір бө­лігін өтейтін болады. Өңір басшысы мер­дігерлер анықталса, су тарту жұ­мыстары басталатынын айтты. Топ­тық сумен қамтамасыз етуде қиын­дықтар бар екенін жасырмады. Рес­публикалық Су комитетімен бірле­сіп, кешенді іс-шаралар тізбегі жа­сал­ған. Новокаменканың жолын жөн­деуге қажетті 116 млн. теңге об­лыстық сессияда қаралып, шеші­ле­тін болады. Архангельскінің бір кө­шесін асфальттауға да қаржылық кө­мек беріледі.

Жиында сөз алған ақсақалдар алқасының мүшесі Әлім Төлебаев 11 жылдық аралас мектеп жанында­ғы шағын орталықта қазақша топ­тың жоқтығына қынжылды. Өңір бас­шысы облыстық білім басқармасы­ның басшысына бұл мәселені 1 қыр­күйекке дейін шешуді жүктеп, тұр­ғындар мен жергілікті билік туындаған сұрақтарды бірге шешсе, кез келген мәселенің жауабы табыла­тынын айтты.

– Білім беру, денсаулық сақтау, сумен жабдықтау салаларына қар­жы жеткілікті түрде қарастырылған. Түйткілді мәселелер біртіндеп шеші­мін тауып келеді. Кей күрделі жайттар уақытты қажет етеді. Алда атқарылатын шаруалар жетіп арты­лады. Әрқайсысы рет-ретімен шешіледі, – деген өңір басшысы жеке кәсіппен шұғылданамын деуші­лер­ге 2,5 пайызбен шағын несие берілетінін атап өтті.

Мираш ӘБУОВ.

Алдияр АЙТПАЕВ.