Soltüstık Казахстан
Ерекше қажеттіліктері бар балаларға қамқорлық отбасында ғана емес қоғамда да көрсетілуі керек. Олар өздерін дені сау сәбилер сияқты сезінулері тиіс. Облыс орталығында “Барлығымыз теңбіз” деген атаумен ұйымдастырылған фестиваль осы мақсатты көздеді. Оған өнер мен спортқа әуес өрендер қатысты.
Бұл шараны М.Қозыбаев атындағы Солтүстік Қазақстан университетінің “Мәдени тынығу жұмысы” мамандығы бойынша білім алып жүрген студенттері ұйымдастырды.
– Біз ерекше күтімді қажет ететін балаларға көтеріңкі көңіл күй сыйлауды жөн көрдік. Олар көрермендер алдында өз қабілеттерін паш етіп, ән айтып, би биледі. Қазылар алқасы сахнада өнер көрсеткен олардың барлығын жеңімпаз деп танып, сыйлықтар үлестірді. Петропавл қаласында осындай санаттағы балалар аз емес. Бұл шараны өткізу арқылы олардың ата-аналарына психологиялық көмек көрсетуге тырыстық, – дейді фестивальді ұйымдастырушылардың бірі Ирина Рева.
Қаладағы мектеп оқушыларының басын қосқан шара №8 мектепте өтті. Аталған білім ордасында 2018 жылы инклюзивті білім беру кабинеті ашылған. Онда бүгінде он бала оқиды. Олардың әрқайсысы өнерлі. Бірі ән айтса, енді бірі спортқа бейім.
– Фестивальді ұйымдастырушыларға ризашылығымыз шексіз. Бір серпіліп қалдық. Ерекше қажеттеліктері бар перзент тәрбиелеп отырған ата-аналардың дені жан жараларын ашып айта бермейді. Мұндай сәбилер де қоғамның толыққанды мүшесіне айналулары керек. Осындай мәдени шаралар жиі өткізіліп тұрса нұр үстіне нұр болар еді, – дейді ата-аналардың бірі Ольга Коробкина.
Аманжол НҰРТАЗИН,
“Soltüstık Qazaqstan”.