Soltüstık Казахстан
№17 ұлттық өркендеу орта мектеп-кешенінде 1 мамыр – Қазақстан халқының бірлігі күніне арналған фестиваль өтті. Шарада өңірімізде бір үйдің балаларындай тату-тәтті тұрып жатқан түрлі этнос өкілдерінің тағамдары, салт-дәстүрлері көрсетіліп, концерттік бағдарлама қойылды.
Біздің еліміз – көпэтносты мемлекет. Жүзден астам ұлыстың қарашаңырағына айналған Қазақстанды әлем жұртшылығы бірлігі бекем, тірлігі көркем ел ретінде үлгі тұтады. Фестиваль барысында Отанды сүюдің маңызы туралы айтылып, ұстаздар қауымы жас ұрпақты елжанды, қайырымды болуға шақырды.
Бүгінде аталмыш білім ордасында 2 мыңға жуық бала білім алып жатыр. Олардың арасында он жеті этностың өкілі бар. Концерттік шарадан оқушылардың ата-аналары да қалыс қалмады. Шараға қатысқан меймандарға мерекелік дастарқан жайылды.
– Бірлігі мықты ел озады. Біз осы сөздің мағынасын шәкірттер жүрегіне ұялатуды көздейміз. Фестиваль аясында ақшаңқан киіз үйлер тігіліп, қазақ, орыс, украин, татар, әзірбайжан, корей халықтарының ұлттық тағамдары мен салт-дәстүрлері көрсетілді. Мерекелік шараға келген әрбір қонақ керемет көңіл күйге бөленді, – дейді білім ордасының директоры Ләззат Жолмұқанова.
Қонақтар спорттық ойындарға қатысты. Футбол, армреслинг, арқан тартып сайысты.
Ұлттық ойындарға ерекше қатысқандар марапатсыз қалмады. Жеңімпаздар бағалы сыйлықтарға ие болды. Бұл күні мерекелік жәрмеңке де ұйымдастырылды. Онда ұстаздар, ата-аналар мен оқушылар келушілер назарына өздері жасаған қолөнер бұйымдарын ұсынды.
Рабиға ЕРАЛЫ,
“Soltüstık Qazaqstan”.