Бірліктің алтын ұясы

Жүз отыздан астам этносты бауырына басқан Қазақстанды әлем жұртшылығы татулық пен тыныштықты ту еткен, бірлігі бекем, тірлігі шуақты мемлекет ретінде үлгі тұтады. Иә, біздің ата-бабаларымыз ынтымақ берік орнаған жерге ырыс пен несібе ұялайтынын әлімсақтан білген. Тағдырдың жазуымен түрлі этностарға пана болған қазақ жері бүгінде береке мен келісімнің алтын ұясына айналып отыр. Қазіргі буынға қой үстіне бозторғай жұмыртқалаған бейбіт өмір сүру бақыты бұйырыпты. 1 мамыр – Қазақстан халқының бірлігі күніне арналған мерейлі іс-шараларда достық пен тыныштық кеңінен дәріптелді.

1996 жылдан бері тойланып келе жатқан бұл мерекені қызылжарлықтар да сәт-салтанатымен атап өтті. Негізгі мәдени шаралар Петропавл қаласының Орталық алаңында ұйымдастырылып, білім ошақтары мен музейлерде, театрларда, ірі сауда үйлерінде жалғасын тапты. Еңбектеген баладан еңейген қарияға дейін мерекелік думанның қызығына бөленіп, концерттік бағдарламаларды тамашалады. Сахнаға көтерілген өнерпаздармен бірге ән айтты, би биледі.

Қазақстанда тұратын этностардың тарихына көз жүгіртсек, әртүрлі тағдырлар мен өмір иірімдеріне қанығамыз. Мәселен, өткен ғасырдың елуінші жылдарының соңы мен алпысыншы жылдардың басында кеңес одағының әр түкпірінен жастарды еліміздегі тың игеру жұмысына тартқан болатын. Қасиетті қазақ жеріне келген түрлі этнос өкілдері тамырын тереңге жайды. Олардың ұрпақтары бүгінде бірлігі мен татулығы жарасқан елімізге тастай батып, судай сіңді.

Тонның ішкі бауындай тірлік ке­шіп отырған өзге этностардың біразы елдің шетінде, желдің өтінде орналасқан, “Солтүстіктің қақпасы” саналатын қасиетті Қызылжар же­рінде тұрып жатыр. Олар жыл сайын бұл мерекені асыға күтеді. Қазақстан халқы облыстық ассамб­леясы жанындағы этнобірлестіктерге жи­налып, атаулы күні тұрғындарға қандай көңіл күй, мерекелік дас­тарқан сыйлайтындарын ақылда­сады.

Ұзыннан-ұзақ созылып жатқан Қазақстан Конституциясы көшесі күндегідей емес, өзгеше сипатқа енді. Ұлттық киімдерін киген бірқа­тар этнос өкілдері өз ұлттарының тарихы мен салт-дәстүрлері тура­лы сыр шертті.

Негізгі думан Орталық алаңда өтті. Тұрғындардың дені осы жерге жиналыпты. Сахна төрі­не көтерілген күміс көмей әншілер мен мың бұралған бишілер көрер­меннің көңілін өздеріне аудартты. Әсем ән мен күмбірлеген күй тың­даған жұртшылық өнерпаздарға де­ген ілтипат-қошеметін қол шапа­лақ­тау арқылы білдіріп жатты. Алаңда қазақ күресінен балалар арасында жарыс ұйымдастырылды. Жас спортшылардың тартысты ойыны көрермендердің қатарын қа­лыңдата түсті.

Мерекелік іс-шараға облыс әкімі Айдарбек Сапаров та қа­тысты. Өңір басшысы түрлі этнос өкіл­дері әзірлеген тағамдардан дәм татып, қолөнер бұйымдарының жасалу жолдарымен танысты.

Орталық алаңда қаз-қатар тізілген киіз үйлерге әр этностың өкіл­дері жайғасыпты. Олар жұртшы­лыққа ұлттық салт-дәстүрлері туралы кеңінен баяндап, өнерлерін көр­сетті. Содан кейін жиналған жұртшылық “Бірлігіміз жарасқан” атты фестивальді тамашалады. Есім­де­рі елімізге белгілі әншілер өз өнер­лерімен концерттің ажарын аша түсті. Алдыңғы толқын өкілдері, этномәдени бірлестіктердің жетекшілері сөз сөйлеп, солтүстік­қазақстандықтарды мерекемен құт­тықтады.

“Жуырда Қазақстан халқы Ас­самблеясының ХХХІІ сессиясында Мемлекет басшысы Қасым-Жо­март Тоқаев халықтың бірлігі бекем болса, экономикалық даму, бейбіт­шілік пен тұрақтылық болатынын айтып өтті. Елімізде өмір сүріп жат­қан барлық этнос өкілдері өз болашағын Қазақстанмен байланыстырады және оның өркендеуі үшін аянбай еңбек етіп келеді. Біздің жалғыз Отанымыз бар. Ол – Қазақ­стан. Тәуелсіз еліміз жасай берсін!” – деді қалалық ардагерлер кеңе­сінің төрағасы Жангелді Тәжин.

Алаңға жиналғандар алтыбақан теуіп, тоғызқұмалақ, шахмат, дойбы ойнаудан сынға түсті. Асық атудан өткен жарысқа жасөспі­рімдер ерекше қызығушылықпен қатысты.

Мерекелік шаралар “Бір үйдің баласындай” атты галаконцертке ұласты.

“Біз сәуір айында облыстық бай­қау ұйымдастырған едік. Оған бала­лар, жастар және ересектер қа­тысты. Бұл концертке жүзден жүй­рік шыққан өнерпаздар шақыр­тылып отыр. Біз оларды үлкен сахнаға шығарып, жұртшылыққа таныстырғымыз келді. Бұл бастама алдағы уақытта да жалғасын тап­пақ”, – деді қалалық Мәдениет үйі­нің көркемдік жетекшісі Мұхамедәли Испанов.

Концертке қатысушылар қазақ, орыс, үнді, украин сынды ұлттар­дың билері мен әндерін орындап, көпшілікті сүйсіндірді.

Орталық алаңда қалалық жас­тар ресурстық орталығының ұйымдастыруымен “Мы едины, когда вместе” атты флешмоб ұйымдастырылды. Онда өңір колледждерінің студенттері белсенділік та­нытып, “Бірлік – басты байлығымыз!” – деп ұрандады.

Айшагүл ӘШІМОВА,

“Soltüstık Qazaqstan”.