Soltüstık Казахстан
Сәуір айының басынан бері өңір ормандарында 8 өрт болып, от 31,8 гектар аумаққа жайылды. Бұл туралы облыстық төтенше жағдайлар жөніндегі департамент бастығының орынбасары Дмитрий Растихин айтты.
“Тұрғындардың дені үй маңында, әсіресе желді күні қоқысты жағу аса қауіпті екенін түсіне бермейді. Мәселен Мағжан Жұмабаев ауданындағы Бәйтерек ауылында өрт болды. Сол күні желдің екпіні секундына 28 метрге жетті. Салдарынан тұрғын үй, жазғы ас үй, 2 гараж, отын қора, монша, ВАЗ-2106 жеңіл көлігі және Урал мотоциклі жанып кетті. Үй иесі қорада тұрған шошқа мен 20 үй қоянын шығарып үлгермеген. Өрт жайпаған аумақ 278 шаршы метрді құрады”, – деді ол.
Осы аудандағы Сарытомар ауылында да өрт оқиғасы орын алды. Үй иесі тұрмыстық қалдықтарды жаққан. Ұшқын қораға түскен, қатты желден ол жайылып, баспана мен қора-қопсы, 4 ірі қара мал, 3 қой және 25 тауық жанып кетті.
Ақерке ДӘУРЕНБЕКҚЫЗЫ,
“Soltüstık Qazaqstan”.