Soltüstık Казахстан
Өңірімізде “Таза су айдындары” акциясы жүріп жатыр. Су айдындарын қоқыстан тазарту арқылы халықты қоршаған ортаны күтіп ұстауға баулымақ. Бір айдан бері табиғат жанашырлары өзен-көлдерді жағалап, тұрмыстық қалдықтарды жинап жатыр. Осы жолғы игілікті іске 60 белсенді қатысты. Олар Есіл өзенінің Қарғалы аралындағы тұсын қоқыстан тазартты.
– Осыған дейін Сергеев су қоймасы және Пестрое көлінің маңын жинадық. Барлығы 8 тоннадан астам қоқыс шығарылды. 58 техника жұмылдырылып, 150-ден астам адам атсалысты. Жалпы біздің өңірде 300-ден астам су айдынын жалға алған 154 адам бар. Олар да осы науқанға қатысып жатыр, – дейді Есіл облысаралық бассейндік балық шаруашылығы инспекциясының бас маманы Амангелді Қажығалиев.
Акцияның белсенді қатысушысы – М.Қозыбаев атындағы Солтүстік Қазақстан университетінің 3-ші курс студенті Қымбат Хайкенова қоршаған ортаға қамқорлықпен қарап, тазалық шарасын жиі ұйымдастырып отыру қажеттігін айтады. Ең бастысы, табиғат аясына шыққанда қоқыс қалдырмау керек. Себебі табиғатты қорғау – барша азаматтың парызы. “Таза су айдындары” акциясы маусым айына дейін жалғаспақ.
Самал ЖҮНІСОВА.