Soltüstık Казахстан
“Қазақстан халқына” қорының демеушілігімен өңіріміздегі ерекше білім беру қажеттіліктері бар балаларға арналған тағы бір мектеп-интернат заманауи қондырғылармен жарақтандырылды. Ғабит Мүсірепов атындағы аудандағы Ломоносов арнайы (түзету) мектеп-интернатының материалдық-техникалық базасын нығайту үшін қордан 13 млн. теңге бөлініпті. Қазіргі уақытта мектепте 58 бала тәлім-тәрбие алады, оларға 33 ұстаз білім береді.
Ломоносов арнайы (түзету) мектеп-интернатының директоры Наталья Ахмадуллинаның айтуынша, қоғамдық қор бөлген қаржыға ұстахана, математика, әлеуметтік-тұрмыстық бағдарлау кабинеттері жабдықталыпты. Балалар жаңа әрі заманауи дүниелерді қолдана отырып, дағдыларын жетілдіреді.
Елімізде арнайы мектептерге қаржы жеткілікті бөлінбейді. Осы ретте “Қазақстан халқына” қоры бұл мәселеге зор көңіл бөліп отыр. Бұл қаржылық қолдаудың нәтижесінде оқу және түзету-дамыту жабдықтары жаңаланады және ерекше білім беру қажеттіліктері бар балаларды дамыту мен әлеуметтендіру үшін қолайлы жағдай жасауға мүмкіндік береді
Аталған қор біздің өңірде ерекше білім беру қажеттіліктері бар балаларға арналған жеті арнайы мектепті жабдықтайды. Осыған дейін есту кемістігі бар балаларға арналған облыстық арнайы (түзету) мектеп-интернатының материалдық-техникалық базасын жаңартқан еді. Алдағы уақытта даму мүмкіндігі шектеулі балаларға арналған Чкалов арнайы (түзету) мектеп-интернаты, Соколов арнайы мектеп-интернаты, №1 арнайы түзету мектеп-интернаты, №2 арнайы түзету мектеп-интернаты және Шөптікөл арнайы мектеп-интернаты жабдықталады.
Жалпы “Қазақстан халқына” қоры екі жыл ішінде арнаулы мектептердің материалдық-техникалық базасын нығайтуды көздеп отыр. Бірінші кезең бойынша жабдықталатын 32 арнайы мектепті жарақтандыруға 2 млрд. 764 млн. теңге бөлінеді.
Гүлден СИМБАЕВА.