Soltüstık Казахстан
Халықаралық балалардың құқықтарын қорғау күніне орай бірқатар мерекелік іс-шаралар өтіп, оған мыңдаған ұл-қыз қатысып, жаймашуақ жазды көтеріңкі көңіл күймен қарсы алды. Аталмыш шаралардың ең ірісі Оқушылар сарайында ұйымдастырылды. “Ғылым әлеміндегі балалар” атты фестиваль аясында елуден астам іс-шара өтіп, оларға аудандардан келген 3 мыңнан астам бүлдіршін қатысты.
“Балалық шақтың сиқырлы әлемі” атты концерттен соң түрлі бағыттар бойынша шеберлік сағаттары жүргізілді. Ғылымға қызығушылар үшін виртуалды ойындар, спорттық сайыстар ұйымдастырылып, танымдық материалдар көрсетілді. Зертханаларда түрлі тәжірибелер жасалып, жас зерттеушілер өз қабілеттерін танытты. Жасөспірімдер де мерекеден шет қалмай өзге өңірлерден келген ғалымдармен кездесіп, өз сұрақтарына жауап алды. Өзге де шығармашылық, ғылыми байқаулар қорытындыланып, жеңімпаздарға құрмет көрсетілді.
Қаланың бас алаңында облыстық балалар мен жасөспірімдер шығармашылығы орталығының мамандары мен тәрбиеленушілері концерт қойды. Концерттен бөлек балғындар арқан тартыс, асық ату, көпсайыстан сынға түсіп, ойын ойнады.
– “Бақытты Қазақстан – бақытты балалық шақ” атты концертке облыстық балалар мен жасөспірімдер шығармашылығы орталығы және қалалық Мәдениет үйінің шығармашылық ұжымдары қатысты. Шығармашылық орталығының ұйымдастыруымен “Динамо” стадионында “Бір аспан – бір әлем” атты ұшатын аппараттар сайысы өтті. Сонымен қатар балалар киіз үйде шахмат ойнаудан жарысты. Робототехника бойынша өткен шеберлік сағатына қызығушылар саны аз болмады, – дейді облыстық балалар мен жасөспірімдер шығармашылығы орталығының бөлім меңгерушісі Саян Ермек.
Бүгінде 360 балғын ем алып жатқан облыстық балалар ауруханасы да мерекеден шет қалған жоқ. Онда өнерлі өрендердің сурет байқауы өтіп, аяғы көңілді шараға ұласты. Қалалық кәмелетке толмағандардың істері және құқықтарын қорғау жөніндегі комиссия мүшелері де балалардың жанынан табылып, олардың қуанышына себепші болды. Облыстық көпбейінді балалар ауруханасының дәрігері Нұрлан Аймановтың сөзінше, бұл күні балалар таза ауада серуендеп, қалалық Мәдениет үйі дайындаған концертті тамашалаған. Мамандар жұқпалы аурулар бөлімшесіндегі бүлдіршіндерді жеке құттықтапты.
Мереке күні Қызылжар ауданында 11 ойын алаңы пайдалануға берілді. Аудан орталығы Бескөл ауылында да ауқымды шара өтіп, осында тұратын бүлдіршіндердің басын қосты. Мерекені асыға күткен балалар сурет салып, ойын ойнады.
– Бүгінгі күн бәріміз үшін керемет өтті. Достарымызбен бас қосып, жарыстарға қатыстық, ойнадық. Сурет салу да біз үшін қызық болды. Жаңа ойын алаңы ұнады. Енді жазда осында жиі келіп тұрамыз. Осындай мереке ұйымдастырған үлкендерге алғыс айтқымыз келеді, – дейді мәз болған жеткіншектер.
Мұндай ойын алаңы облыс орталығында да ашылып, қала шетіндегі жұртшылық қуанышқа кенелді. Жалпы биыл қала бойынша осындай 20 алаң мен 30 спорт алаңы салынады деп күтілуде.
Мерекеге орай облыстық қуыршақ театрында қойылым сахналанып, жас көрермендер ерекше әсерге бөленді. Ал арт-орталықта өнер мектебі тәрбиеленушілерінің қатысумен концерт өтті. Балалардың бос уақытын пайдалы өткізу үшін облыстық төтенше жағдайлар жөніндегі департамент мамандары қорғаныс құралдарының көрмесін, тәртіп сақшылары жол қауіпсіздігі акциясын өткізді.
Диас АЯҒАН,
“Soltüstık Qazaqstan”.