Soltüstık Казахстан
Балуандық – ата-бабамыздан жалғасқан ежелгі өнер. Аты аңызға айналған, жауырыны жерге тимеген қазақ палуандары қаншама?! Ал солардың ізін жалғастырып, боз кілемде ел намысын абыроймен қорғап жүрген бүгінгі балуандарымыз мақтауға да мақтануға да тұрарлық.
Солтүстікқазақстандық Аманғали Бекболатов – ел сенімін ақтап жүрген спортшылардың бірі. Жуырда Қырғызстанда өткен халықаралық турнирде жеңіс тұғырынан көрініп, қола жүлдегер атанды. Әр медалі – қажырлы еңбектің нәтижесі.
Әлемдік аренаға шығып, еліміздің абыройын асқақтатып жүрген спортшылардың басты мақсаты – мемлекеттік Туымызды желбіретіп, Әнұранымызды әуелету екендігі сөзсіз. Аманғали Бекболатов жеңіс тұғырына көтерілгенде ерекше сезімде болатынын айтады.
– Әр спортшының басты мақсаты – ел абыройын асқақтату, қазақ дейтін халық бар екенін таныту, байрағыңды көкте желбіретіп, әнұраныңды шырқату. Сондықтан халықаралық жарыстарда алған медальдарымның орны бөлек. Байрақты бәсекелерге қазақ елінің атынан шыққан соң барымды салып күресемін. Жеңсем спортшы ретінде ел сенімін ақтағаныма қуанамын, – дейді Аманғали Бекболатов.
Елін сүйген азаматтың дүйім жұрттың алдында, салтанатты түрде елінің көк байрағын иығына жамылған кездегі тебіренісін сөзбен айтып жеткізу қиын. Өзің үшін ғана емес, үміт артқан отандастарыңның абыройын асқақтатқаныңа қуанасың. Осындай сезімге бөлену үшін спортшылар күні-түні тер төгіп жаттығады, шыңдалады.
– Шыдамды адам ғана биік шыңды бағындырады. Қандай қиындық кездессе де, жігеріңді жасытпау керек. Жеңіс – тек қажырлы еңбекпен ғана келеді. Қара терге малынып, күндіз-түні жаттығу жасамасаң, әлемдік ареналарда жеңіске жете алмайсың. Спортта ұлт намысын қорғау үшін жүргеніңді ұмытпау керек. Сол ой жігерлендіреді, қайратыңды арттырады. Елдің қолдауын сезінесің. Бұл сезім әр спортшыны рухтандырады. Намысы бар адам биік белесті бағындырады, – дейді Аманғали Бекболатов.
Балуан 2020 жылдың қатарында Францияда өткен Гран при турнирінде алтыннан алқа тақты. 2022 жылдың сәуір айына Моңғолия астанасы Ұлан-Батырда өткен Азия чемпионатында Қазақстан құрамасының қоржынына күміс медаль салды. 2023 жылдың ақпан айында Мысыр елінде грек-рим күресінен Ибраһим Мұстафа атындағы рейтингтік турнирге қатыстып, алтын жүлдемен оралды. Соңғы додада – Қырғызстанда өткен турнирде қола жүлде алды. Аманғалидың жеңісті жолы 2010 жылы облыстық чемпионаттағы күміс жүлдеден басталған еді. Содан бері спортшы жеңіс тұғырынан түспей келеді.
“Елім дейтін ер болмаса, ерім дейтін ел қайдан болсын”, Қазақстанның көк байрағын желбіретіп, Әнұранын шырқататын осындай азаматтарды халық мақтан тұтады. Намысты ұлдары бар ел жасампаз.
Ақбота ҚАБДУЛМӘЖІТ,
М.Қозыбаев атындағы СҚУ-дың студенті.