Soltüstık Казахстан
Жамбыл және Ғабит Мүсірепов атындағы аудандарда этнолагерлер ашылды. Сауықтыру орталықтары жұмысының негізгі мақсаты – балалардың жазғы демалысын тиімді әрі пайдалы өткізу.
Жамбыл ауданындағы “Атамекен” этноауылында Айымжан, Айтуар, Новорыбинка, Благовещенка мектептерінің оқушылары уақыттарын қызықты өткізіп, алтыбақан теуіп, бесасық ойнады. Театрландырылған қойылым арқылы қазақ халқының салт-дәстүрлері мен әдет-ғұрыптары жайлы мол ақпарат берілді. Сондай-ақ балалар атқа мініп, садақ атып, кілем тоқуды үйренді.
Ал Ғабит Мүсірепов атындағы ауданда ашылған “Туған өлке” этноауылында ұлттық ойындар ойналып, түрлі концерттік бағдарлама қойылды, түрлі тағамдар әзірленді. Бір сөзбен айтқанда, бүлдіршіндерге ұлттық рухты сезіну үшін бар жағдай жасалды.
Облыстық білім басқармасының дерегінше, біздің өңір республикада алғашқылардың бірі болып этноауыл жобасын қолға алған.
– Этноауылдарда балалар дәстүрлі лагерь корпустарының орнына ұлттық нақышта безендірілген киіз үйлерге орналастырылады. Ұлттық ойындар ойнатылады. Үлкендер қыздарға бауырсақ пісіруді үйретсе, ұлдарға самаурын қайнатудың сыры көрсетіледі. Демалушыларға ұлттық дәстүрлер түсіндіріледі. Жазда тек осы екі этнолагерьде 3700 бала демалады деп жоспарлануда, – дейді облыстық білім басқармасының баспасөз хатшысы Әсел Оразбаева.
Рабиға ЕРАЛЫ,
“Soltüstık Qazaqstan”.