ЖАЙДАРЛЫ ЖАЗДЫҢ ҚЫЗЫҒЫ

Оқушылар жазғы демалысқа шықты. Тоғыз ай бойы білім нәрімен сусындаған жеткіншектер асыға күткен демалыстарын қызықты өткізгілері келері сөзсіз. Ауыл баласының қалаға, қала баласының ауылға қарай асығатын кезі де осы жаз айлары. Солтүстік­қа­зақстандық оқушылардың жазғы демалысы қалай ұйымдастырылып жатқаны туралы облыстық білім басқармасының мамандарынан сұрап білдік.

Жеткіншектердің басым бөлігі үй­ден жырақта демалғанды ұнатады. Оған қолайлы орта – балалардың демалыс лагерьлері. Балалардың қауіпсіздігін қамтама­сыз ете отырып, мәдени-танымдық шаралар өткізе­тін лагерьлерді ата-аналар да қол­дайды.

Басқарманың жоспары бойын­ша биыл 1-10 сынып аралығындағы 67 мың оқушы жазғы демалыс лаге­ріне барады. Маусымның 5-нен бастап мектеп жанындағы, бейіндік, спорттық, сауықтыру лагерьлері өз жұмыстарына кірісті. Жамбыл мен Ғабит Мүсірепов атындағы аудан­дарда этнолагерлер есіктерін айқа­ра ашты.

Жазғы демалысты ұйымдасты­ру – білім беру ұйымдарына жүкте­летін міндеттердің бірі. Бұл жұмыс жыл өткен сайын ширайла түсуде. Оның бір дәлелі – лагерьлерде демалғысы келетін балалар санының артуы. Мемлекеттің де көздегені осы – кішкентайлардың ба­ла­лық бал дәуренін шаттыққа бөлеу. Осы мақсатқа бюджеттен қомақты қаржы бөлінеді.

Облыстық білім басқармасы бер­ген деректерге сүйенсек, әрбір мектептің жанында де­малыс орталығы жұмыс істейді. Ол жерде оқушылар өздерінің қатар­лас­тарымен бірге танымдық-тағылымдық шараларға қатысып, ойын­ға құмарларын басып, кешкісін үй­леріне қайтады.

Сондай-ақ облыс аумағында оқу­шылардың 14 жазғы демалыс лагері бар, биыл соның 11-і іске қосылған. Осы демалыс орындарын жөндеуден өткізу үшін жергілікті бюджеттен 94 млн. теңге қаржы бөлінген. Барлық лагерь 6-шы маусымнан бастап демалушы­ларын қабылдай бастады.

Оқушылар уақыттарын қы­зықты әрі тиімді өткізуі үшін барлық жағдай қарастырылған. Әрбір ла­герьде спорттық үйірмелер жұмыс іс­тейді. Онда жеткіншектер баскет­бол, волейбол, тоғызқұмалақ, дой­бы, шахмат және асық ату, арқан тар­тыс, сиқырлы таяқ, алтыбақан секіл­ді ойындарды ойнап, құмарларын басады. Концерттік шара­лар, қолөнермен айналысу сағатта­ры, кітап оқу, спорттық-сауық­тыру ойындары демалушылар үшін қызықты болары сөзсіз.

Лагерьде тәрбиешілер, жаттық­тырушылар, аспаздар, медбикелер қызмет атқарады. Ас мәзірі де жас ағзаға пайдалы етіп дайындалады. Бір оқушыны 10-14 күндік демалыс­қа жіберу үшін 35-65 мың теңге ара­лығында қаржы жұмсалады. Оқушы­ларға жолдама алып берудің жолда­ры да әртүрлі. Ата-аналардың өз­дері немесе кәсіпкерлердің демеу­шілігі арқылы жолдаманы сатып алу­ға болады. Сондай-ақ әлеуметтік жағдайына қарай мемлекет есебінен жіберілетін балалар да бар.

Солтүстік Қазақстан облысында биыл 20175 бала жазғы сауықтыру лагеріне тегін барады. Осы мақсатқа бюджеттен 92,5 млн. теңге бөлінген. Білім басқарма­сы­ның мәліметіне сүйенсек, бюджет есебінен сауықтыру лагеріне де әлеу­меттік қорғалмаған отбасылардан шыққан – 10816 бала, ерекше білім беру қажеттіліктері бар – 771 бала, әртүрлі салаларда жетістікке жеткен – 7074 оқушы, девиантты мінез-құлқы бар 1514 бала демалады. Бұдан басқа республикалық бюджеттен ба­лалардың демалысын ұйымдасты­руға 352 квота бөлінді. Соның ішінде бір күні 12 мың теңге тұратын “Бал­дәуренге” 282 жасөспірім, күні 13600 теңге “Бөбекке” 70 бала барады. Бұ­дан басқа Петропавлдағы “Сол­нечный” сауықтыру орталығында 750 бала денсаулығын түземек. Мұн­да бір тәулігі – 5500 теңге тұрады.

Өздері жолдама сатып алғысы келе­тіндерді құлаққағыс етсек, өңіріміз­дегі мемлекеттік лагерьлерде 35000 теңгеге, “Серебрянный бор” немесе “Эдельвейс Бурабай” лагеріне 65000 теңгеге, қалалық лагерьлерде 55000 теңгеге демалуға болады.

“Этноауыл” жобасы бойынша де­малыс – тегін. Лагерьдің бірегей фор­маты балалардың қазақ халқының мәдениетімен танысуға мүмкіндік жасайды. Маусымның 5-сі күні екі этноауыл есігін айқара ашты. Жамбыл ауданындағы “Атамекен”, Ғабит Мүсірепов атындағы аудандағы “Туған өлке” этноауылдарына жет­кін­шектер келіп, күн ұзаққа демалуда. Осындай демалыс орталық­тары Уалиханов, Шал ақын, Тимирязев аудандарында да ашылады. Этноауылдарда жаз бойына 10 мың­нан аса оқушының демалысы жос­парланып отыр. Балаларды апарып-алып кету аудандық білім бөлімдері мен мектептерге жүктеледі. Этно­ауылдар жазғы лагерьлердің аума­ғында орналасқан.

– Әдеттегі лагерь корпустары­ның орнына ұлттық нақышта безен­дірілген киіз үйлер орналастырыла­ды. Ұлттық ойындар мен спорт түр­лері ойнатылады. Әжелердің көмегі­мен қыздар бауырсақ пісіреді, ұл­дар самаурын қоюды үйренеді. Демалушыларға ұлттық дәстүрлер түсіндіріліп, рәсімдер көрсетіледі. Балалар атқа мініп серуендей­ді, ұлттық ойындар мен түрлі кон­курстарға қатысады. Киіз үйлерде дәмді дастарқан жайылады, – дейді облыстық білім басқармасының баспасөз хатшысы Әсел Оразбаева.

Гүлгүл ҚУАТҚЫЗЫ,

“Soltüstık Qazaqstan”.