Soltüstık Казахстан
Егеменді еліміздің рухани жаңғыруына, кемелденуіне кітапхананың қосар үлесі зор. Ұлттық құндылығымызды сақтап, жазба мұраларымызды ұрпақтан ұрпаққа жеткізу мақсатында тың жұмыстар атқарылып жатыр. Ауданның, ауылдың кітапханалары да болсын елімізде болып жатқан іс-шаралардан тыс қалған емес. Бүгінгі таңда ақпаратты пайдаланушылардың сұранысы жоғары, мазмұны да өзгерген. Оқырмандарға қызмет ету, оның көңілінен шығу, іздегенін тез және толықтай тауып беру – кітапханашыға жүктелетін зор міндет.
Есіл ауданының орталықтандырылған кітапхана жүйесі ұйымдастырған “Кітап пен оқу” фестивалі жоғарыда айтқан сөзімізге дәлел болатындай. Аталмыш кітапхананың тұрақты оқырманы болғандықтан, мен де осы іс-шараның куәсімін. Онда әдебиет және ертегілер кейіпкерлерінің шеруі өтті. Қазақ әдебиетінің тарихи тұлғалары Абай, Мағжан, сондай-ақ Мәрям Хәкімжанованың “Мәншүк” поэмасындағы Мәншүк Мәметова бейнесін және шетел әдебиетінен Г.Хаггардтың “Клеопатрасы”, Р.Стивенсонның “Остров сокровищ” шығармасындағы Билли Бонсаның, Джеймс Фенимор Купердің “Прерия” романындағы Бампо Натаниэль, А.Дюманың белгілі романы “Үш мушкетерының” кейіпкері Д Артаньян, Гогольдің “Ночь перед рождеством” повесіндегі Солоха, “Мың бір түн” ертегісіндегі Шахерезада және де балалар әдебиетінің кейіпкерлері Айболит, Жалмауыз кемпір, Карлсон бейнелерін сомдаған кітапханашылар оқырмандардың көңілінен шықты. Аудандық орталық кітапхана жыл сайын ең үздік оқырмандарды марапаттауды дәстүрге айналдырған. Оқырмандар әр түрлі аталымдар бойынша марапатталды. “Мағжанда қонақта” библиокафесінде оқырмандар ақиық ақынның шығармашылығына арналған викторина сұрақтарына жауап беріп, жайылған дастарқаннан дәм татты.
Ысқақ АРҚАЕВ,
зейнеткер.
Есіл ауданы.