Soltüstık Казахстан
Қызылжар ауданының әкімдігі кәсіпкердің жұмысына кедергі келтірген. Белгілі болғандай, жергілікті билік кәсіпкердің фермерлік қожалықтың басшысын ауыстыруға қатысты қаулысына өзгерістер енгізу жөніндегі өтінішін орындаудан бас тартыпты. Оның үстіне барлық үлескерлер жиналысының келісімі туралы хаттаманы талап еткен.
Фермер шаруашылықтың заңды қызметіне кедергі келтірген әкімдіктің әуре-сарсаңынан субсидиялардан және мемлекеттік қолдаудың өзге де шараларынан айырылып қалмау үшін сыбайлас жемқорлыққа қарсы іс-қимыл агенттігінің облыстық департаментіне жүгінді.
Қазақстан Республикасы Жер кодексінің 54-бабына сәйкес, үлестiк меншiкке (үлестiк жер пайдалануға) қатысушылардың алдағы жиналысы туралы хабарлама оның өткiзiлетiн күнiнен бiр айдан кешiктiрiлмей жазбаша түрде қолхат алу арқылы жүргiзiледi. Тиiсiнше хабарланған жағдайда үлестiк меншiкке (үлестiк жер пайдалануға) қатысушылардың немесе олардың өкiлдерiнiң кемiнде 50 пайызы қатысқан кезде жиналыстың құқықтық күшi бар деп саналады.
Департамент мүдделі тараптарды кездестірді. Түсініспеушіліктен туындаған мәселенің түйіні тарқатылды. Себебі кәсіпкер жер заңнамасының талаптарын сақтаған. Оның ішінде фермерлік шаруашылық мүшелерін уақтылы хабардар етіп, олардың жиналысқа келуін қамтамасыз еткен. Осы ретте кәсіпкердің заңды талабы орындалып, Қызылжар ауданы әкімінің қаулысы шығарылды.
Жан АЙТМАҒАНБЕТОВ,
сыбайлас жемқорлыққа қарсы іс-қимыл агенттігі облыстық департаментінің бас маманы.