Soltüstık Казахстан
Айыртау ауданындағы “Шағала” жазғы сауықтыру лагерінде “Тарихқа тағзым – болашаққа бағдар” атты облыстық жас өлкетанушылар слеті өтті. Іс-шараның басты мақсаты – жалпы қазақстандық бірегейлік пен бірлікті қалыптастыру.
Өңірде алғаш рет өткізілген облыстық слетте белсенді, креативті және шығармашылыққа әуес балалардан топтасқан командалар қатысты. Білімпаздар 3 күн бойы жарысып қана қоймай, облыстың тарихы, географиясы, табиғаты мен мәдениеті туралы қызықты мәліметтермен танысты. Сондай-ақ туған өлкенің көрікті жерлері, тарихи және мәдени ерекшеліктері туралы өз білімдерін көрсетті. Балалар үшін арнайы экскурсия да ұйымдастырылды.
Біздің өңір өзінің бай табиғатымен, атақты тұлғаларымен және киелі жерлерімен танымал. Оқушылар Никольское ауылына ат басын бұрды. Олар әлемде алғаш рет жылқы малы қолға үйретілген “Ботай” қонысын аралап көрді. Сондай-ақ Сырымбет ауылындағы тарихи ескерткіш – Айғаным қонысына барды.
Слеттің салтанатты жабылуында үздік нәтиже көрсеткен жас өлкетанушылар кубоктармен және дипломдармен марапатталды.
Рабиға ЕРАЛЫ,
“Soltüstık Qazaqstan”.