Soltüstık Казахстан
Сәбит Мұқанов атындағы облыстық ғылыми-әмбебап кітапханада халық ақыны Ахметжан Нұртазиннің туғанына 115 жыл толуына орай “Жүрегі соққан жырында” атты поэзиялық кеш өтті. Іс-шараға ақынның ұрпақтары, зиялы қауым өкілдері, кітапхана оқырмандары қатысты.
Ахметжан Нұртазин 1908 жылы Шал ақын ауданындағы Көктерек ауылында дүниеге келген. 17 жасынан бастап “көңілдің кейбір сәттерін” қағазға түсіре бастайды. Туған жерінің сұлу табиғатын өлеңмен суреттеген оны жергілікті тұрғындар ерекше құрметтеген. Өмірінің соңғы 25 жылында ақын ауданаралық орман шаруашылығының директоры болып қызмет атқарған.
– Мен Ахметжан Нұртазинді жақсы танимын. Тамаша адам еді. Қарапайымдылығы, аппақ қардай таза көңілі оны өзге өнер адамдарынан айрықшалап тұратын. Үлкенді үлкен, кішіні кіші деп сыйлай білді. Көзі тірісінде табиғат-анамыздың жасарып жайнауы үшін көп еңбек етті. Ақындығы бір төбе, – дейді облыстың құрметті азаматы Болат Сағындықов.
Ақынның көзі тірісінде “Полковник қызы”, “Орман сыры” “Көк тоғай” атты жинақтары жарық көрген. Кеш барысында жиналғандарға Ахметжан Нұртазин жайында видеофильм көрсетілді. Сондай-ақ поэзиялық кеште ақынның шөберелері сөз сөйлеп, “Өмір ғажап”, “Орманда” сынды өлеңдер жинағынан үзінді оқып берді.
– Атамның әр өлеңін оқып отырып туған жерге, өскен ортаға деген сүйіспеншілігін сезінемін. Шал ақын ауданның дамуына қосқан үлесін жерлестері мақтан тұтады. Бүгінгі кешке қатысқандар жылы лебіздер, әсерлі естеліктер айтты. Шараны ұйымдастырушыларға ризашылығым шексіз, – дейді ақынның шөбересі Қанат Тұрлыбек.
Шара соңында поэзиялық кешке келген қонақтар “Табиғат жыршысы” атты кітап көрмесімен танысты.
Рабиға ЕРАЛЫ,
“Soltüstık Qazaqstan”.