Soltüstık Казахстан
Осыдан отыз жыл бұрын Ермек Серкебаев атындағы өнер колледжінің қабырғасында бейнелеу өнері бөлімі ашылған болатын. Содан бері бұл бөлімде талай талантты жас білім алып, сурет салудың қыр-сырын меңгерді. Колледжді тамамдаған қылқалам иелері бүгінде көпшілікті өздерінің тың туындыларымен қуантып жүр. 1993 жылдан бері түлектердің 26 легі түлеп ұшып, 149 маман даярланды. Осы күні оқып жүрген жастардың да аяқалысы жақсы. Олардың алды ірі байқауларда топ жарып, елге сурет өнерінің құдіретін танытып келеді. Дарынды студенттер облыс орталығында сурет көрмесін ұйымдастырып, келушілерге өз жұмыстарын паш етті.
– Көрмеге елуге жуық туынды қойылған. Суретші өзі көрген дүниені дәл сол қалпында сала салмайды. Оны қиялымен ұштастырып, жетілдіріп шығарады. Біздің студенттеріміз де қарапайым пейзаж, натюрморттардың өзін түрлендіріп салуға тырысады. Бейнелеу өнері бөлімінің студенттері республикалық, халықаралық көрмелер мен шығармашылық байқауларға өз жұмыстарын жиі ұсынып келеді, – дейді колледж оқытушысы Людмила Гатыч.
Түрлі жанрдағы сан түрлі суреттердің арасында ұлттық нақышта салынғандары да бар. Асылжан Қазбек өзінің көрмеге қойған екі картинасын салуға бірнеше ай уақытын жұмсаған. Бірінші суретінде бойынан ұлттық болмысы танылған қазақтың сұлу қызы бейнеленсе, екіншісінде қолөнершілер көрініс тауыпты. Кішкентай кезінен бері қылқаламды жанына серік еткен бойжеткен болашақта бұл ісін жалғастырып, сурет арқылы ұлттық құндылықтарымыз бен салт-дәстүрімізді қағаз бетінде қалдыруды мақсат етіп отыр.
Диас АЯҒАН,
“Soltüstık Qazaqstan”.