Оқырман саны он мыңнан асты

Қадірлі оқырман! 2023 жылдың екінші жартыжылдығына мерзімді баспасөзге жазылу науқанының аяқ­талғанын өздеріңіз жақсы білесіздер. Дәстүрлі науқан басталған кезде газет қызметкерлерінің көкейінде “Таралымымыз қанша болады? Оқырманда­рымыздың саны көбейе ме?”, – деген сияқты жауабы беймәлім са­уалдардың ұялағаны жалған емес. Әлем халқын бір тарының қауызына сый­дырардай үрейлендірген панде­мия жылдарында ғасырдан астам тарихы бар қарт басылым – облыстық “Sol­tüstık Qazaqstan” газетінің тара­лымы күрт төмендеп, үш мыңның ар жақ, бер жағын ғана олжалағаны күні бү­гінгідей есімізде. “Облыс жұртшылы­ғын өңірімізде орын алып жатқан жа­ңалықтармен, танымдық, сараптама­лық материалдармен, сыр-сұқбаттармен, тарихи дүниелермен ақпа­раттандырып отырған мемлекеттік тілдегі жалғыз басылымның бола­шағы қалай болмақ?”, – деген сауалдың жетегінде қол қусырып отыра берудің жөн еместігін ескеріп, ұлт, руханият, тіл жанашырларына хабарласып, аудандарды, ауыл-ауылдарды аралауға аттандық.

Әріптестеріміздің бұл жанкешті еңбегі нәтижесіз болған жоқ. Былтыр газетіміздің оқырмандар саны жеті мыңның үстіне көтеріліп, көңіліміз жа­дырап сала берді, анадайдан үміт пен сенімнің ұшқыны көрінгендей күйге бөлендік. Ал биылғы жартыжылдықта жеткен межеміз Қызылжар халқына сауын айтып, алақайлап сүйінші сұрауға жарайтындай. Қазіргі уақытта газет оқырманының саны – 10006 адам.

Әрине, біз бұл көңілтоларлық көр­сеткішке өзіміздің күшімізбен, еңбе­гімізбен ғана жеттік деп айта алмаймыз. Бұл ретте негізін алаштың ардақтысы Мағжан Жұмабаев, Смағұл Сәдуақасов сынды қазақтың арда перзенттері қалаған, керегесін ардың ісіне адалдық танытып, жүрекке сәу­ле құяр отты мақалаларымен таныл­ған қаламгерлер керіп, уығын елдің ертеңі жолында еңбек еткен тұлғалар шаншыған қарт басылымның тара­лымының молаюына облыс басшысы Айдарбек Сапаров пен оның бірінші орынбасары Марат Тасмағанбетов бастаған бір топ руханият жанашырлары көп қолдау көрсетті.

Аудан басшыларының қолдауы мен уәделері біздің үмітімізді үкілей түсті.

Сандарды сөйлетсек, Айыртау, Аққайың, Есіл, Жамбыл, Қызылжар, Мамлют, Шал ақын, Тимирязев ау­дандары алдын ала берілген жос­парды асыра орындап, газеті­міздің жанашырлары ретінде алғы шептен көрінді. Бізді жүз пайызға жетеғабыл көрсеткішімен Ақжар, Мағжан Жұма­баев, Тайынша, Уәлиханов, Ғабит Мүсірепов атындағы аудандар мен Петропавл қаласы да ерекше қуантты. Тұрғындардың сөзі сапа­лы, ойы орнықты төл басылым­ның сүйікті оқырманына айналуы үшін қолда бар мүмкіндікті пайда­ланып, үгіт-насихат жұмыстарын жүргізген аталмыш аудан басшы­ларына ал­ғыстан басқа айтарымыз жоқ. Ел игі­лігі жолында атқарып отырған қызметтеріңіз жемісті болғай!

“Қызылжар-Ақпарат” жауапкершілігі шектеулі серіктестігінің құ­рамындағы облыстық “Soltüstık Qazaqstan”, қалалық “Qyzyljar nūry” газеттерін тарату ісінде азаматтық танытқан жеке жазылушылардың да қатары сирек емес. Мысалы, “Қы­зылжар су” серіктестігінің директо­ры Жеңіс Хамзаұлы Сұлтанов ұжымын қалалық “Қызылжар нұры” газе­тінің 100 данасына жаздыртса, “Есіл су” кәсіпорны өзінің 80 қызметкеріне “Soltüstık Qazaqstan” газетін оқуға мүмкіндік жасады. Облыстық арда­герлер кеңесінің төрағасы Ескендір Елеусізов аудандардағы аға буын өкілдерінің төл басылымға жазы­луын қадағалап, мерейімізді өсірді. Еңбек ардагері Алтай Қопышев зейнетақысынан “Қызылжар нұры” газетін он адамға жаздыртып берді. Қызылжар аудандық “Кәусар” меші­тінің бас имамы Азамат Сәрсенов оз қаражатына он екі газет алатын болды. Бұл тізімді жалғастыра берсек бір мақалаға сыйғыза алмаспыз. Өтінішімізді ести сала оның орын­далуына ұйытқы болған облыстық мәдениет, тілдерді дамыту және архив ісі, білім басқармаларының басшылары Досбол Әбдриисов пен Нәзір Жәшібековтің көрсеткен зор қамқорлықтарына ұжымымыздың атынан ризашылық білдіргіміз келе­ді. Досбол Нұржанұлының тікелей тапсырмасымен Ақан сері атында­ғы облыстық филармония – 40, өңі­ріміздегі кітапханалар 85, музейлер 40, театрлар 70 газетке жазылды. Бі­лім беру мекемелерінің бірқатарына жеке тоқталып, тізгінін ұстап отырған директорларға алғысымызды айтсақ, оның еш сөкеттігі бола қой­мас. Қожаберген жырау атындағы №6 орта мектептің ұжымы “Soltüstık Qazaqstan”-ның – 80, Әбу Досмұхамбетов атындағы дарынды ба­лаларға мамандандырылған гимна­зия-интернаты облыстық басылымның 53 данасын алатын болды. Ахмет Байтұрсынов атындағы №25 мектеп ұжымының – 30, ұлы Абай­дың есімін иеленген мектеп-гимназияның – 25, Сафуан Шаймерденов атындағы қалалық классикалық гим­на­зияның – 23, Мағжан Жұмабаев атындағы жоғары колледж ұжымының 30 дана газетке жазылып, оқыр­мандарымыздың қатарын қалыңдат­қаны – жағымды жаңалық. Қазақтың шынайы азаттығы жолында басын бәйгеге тіге жүре адал қызмет еткен Жүсіпбек Аймауытов бір өлеңінде:

Қазағым, қамықпа, қамалма!

Ел болар қамыңды амалда!

Кетті түн, атып таң, шығып күн,

Сал малды, сал жанды, аянба!, – деп халықты жігерлендірген екен. Алаш ардақтысының осы шумақ­тағы “Сал жанды, сал малды аян­ба!” деп ұран тастауының аста­рында “сауаттарыңды ашыңдар, газет оқыңдар, білім алыңдар, өр­кениетке ұмтылыңдар!” деген сын­ды ағарту­шылық бағытты көздеген ойдың жат­қанын қалам иелері жоқ­қа шығар­майды. Небір тектілердің іздері сайрап жатқан байырғы ба­сылым қылы-шынан қан тамып тұр­ған қиын-қыстау заманның өзінде халқын көзі ашық, көкірегі ояу бо­луға ынталан­дырған ардақтылардың салған сара жолына адалдық танытып келеді.

Жоғарыда айтып өткеніміздей, облыстық “Soltüstık Qazaqstan” газе­тінің бір ғасырдан астам тарихы бар. Жүріп өткен жолы өнегелі басылымның алғашқы саны Омбы қа­ласында басылған. Телегей тарихы “Кедей сөзінен” бастау алатын сүйік­ті газетіміз өз оқырманын тұщымды материалдарымен қуантып келеді. Облысымызда орын алған елге, жер­ге, тілге қатысты түр­лі кемшіліктердің, бірқатар адамдардың толғандыр­ған мәселелерінің газет журналистерінің тікелей араласуымен шешімін табуы үр­діске айналған. Біз оқырмандардың базынасын жауап­ты органдарға жет­кізу мақсатында редакцияның “whatsapp” желісін ашып, тұрғындармен тығыз байла­ныс орнаттық. Елге ерен еңбегімен танылған, адалдық­ты ту еткен қарапайым адамдар: шаруалар, диқандар мен дәрігер­лер, ұлағатты ұстаздар туралы жа­зылған кең құлашты мақалаларымыз жас ұрпақты тәрбие­леу ісіне зор үлес қосуда. Ақпарат майданы­ның батыр жауынге­ріне айналған газетіміздің бұл еңбегінің бағаланбай қалған кезі жоқ. Жуырда 28 маусым – Бұқаралық ақпарат құрал­дары қызметкерлерінің күні қарса­ңында серіктестікке Президентіміз Қасым-Жомарт Тоқаев Алғыс жариялады. Біз бұл мараптты ұжымға берілген зор баға деп қабылдадық.

Алаш қозғалысының қайраткері Ахмет Байтұрсынов: “газет халық­тың көзі, құлағы һәм тілі”, – деген екен. Оқырманын әкенің емес адам­зат­тың баласы болуға тәрбиелеп отырған, ұлдың емес ұлттың сөзін сөйлеуді мұрат тұтқан басылымның өркениет дөңгелегі алға жылжыған сайын абырой-беделі, нық ұста­нымы бір мысқал да кемімейтініне көзіміз жетіп отыр.

Нұргүл ОҚАШЕВА,

“Қызылжар-Ақпарат” ЖШС-ның бас редакторы.