Сапасы жоғары, бағасы арзан

Soltüstık Казахстан

 Kyzylzhar_akparat@mail.ru

Облыс орталығында кезекті ауыл шаруашылығы жәрмеңкесі өтті. Бұл жолы қала тұрғындарына өз өнімдерін алты аудан ұсынды. Жәрмеңкеге өңірдегі ірі ауыл шаруашылығы және қайта өңдеу кәсіпорындары қатысты. Қызылжарлықтар керек-жарағын сатып алып жатқан жәрмеңкеге облыс әкімі Айдарбек Сапаров барды. Сатушылармен тілдесіп, сөреде тұрған өнімдердің сапасына назар аударды.

Сауда-саттық Жамбыл көше­сі бойындағы Спорт сарайының ма­ңындағы алаңда ұйымдасты­рылды. Таңертең басталған шара түстен кейін де жалғасты. Бұл жолы тұрғындарды Ақжар, Ғабит Мүсі­репов атындағы, Тимирязев, Есіл, Жамбыл және Мамлют аудан­дарының кәсіпорындары қуантты. Жәрмеңкеде ет және сүт, бал және ара шаруашылығы өнім­дері нарық бағасынан 15-20 пайыз арзан сатылды.

Жәрмеңкеге 50 тонна азық-түлік, оның ішінде ет өнімдері – 18 тонна, сүт және сүт өнімдері – 4 тонна, ұн және жарма – 10,5 тонна, картоп және көкөністер – 11 тонна, бал және ара шаруашылығы өнім­дері – 2,1 тонна, шұжық өнімдері – 1,8 тонна, тауық жұмыртқасы 6000 дана әкелінді. Мәселен Ғабит Мү­сірепов атындағы аудан кәсіп-кер­­лері ет-сүт өнімдерін өткізу үшін келген. Олар жәрмеңкеде 200 литр сүт, 60 литр қаймақ, 100 келі сары­май, 80 келі сүзбе мен мың жұмыртқа және бір тонна ұн саудалады.

– Қала тұрғындары үшін біз ет өнімдерін де әкелдік. Сиыр етінің орта­ша бағасы – 2100 теңге. Қой етінің бағасы – 2200, жылқы еті – 2700 теңге. Мүшелеріне байланыс­ты баға­лар өзгереді. Жалпы біз ет-сүт өнімдерін, бал, яғни Ғабит Мүсі­репов атындағы ауданда өндірі­летін өнімдердің барлығын әкелдік, – деді Ғабит Мүсірепов атындағы аудан әкімінің орынбасары Ерлан Әділбеков

Сапалы өнімді арзан бағаға алып, көтеріңкі көңіл күймен үйле­ріне қайтып бара жатқандардың жәрмеңкені ұйымдас­тырғандарға алғысы шексіз. “Тауар­лар арзан. Еттен саңырауқұлаққа дейін сатып алуға болады. Еттің сапасы өте жақсы. Мен жылқы, сиыр етін және сүт алдым. Жеміс-жидектің де түр-түрі бар екен. Осындай жәрмең­келердің ұйымдастырылғаны дұ­рыс. Халыққа тиімді. Әйтпесе, дү­кендерде баға тым қымбат, тапқанымыз қапқа­нымызға жетпей қалады”, – дейді Петропавл қаласының тұрғыны Әлкен Сейітжанов.

Жәрмеңке тауарлар мен көр­сетілетін қызметтердің сапасы мен қауіпсіздігін бақылау комитеті об­лыстық департаменті ұсынған сани­тарлық нормаларды сақтай отырып өткізілді.

– Мұндай жәрмеңкелер әлеу­меттік маңызы бар азық-түлік өнім­дерінің бағасын тұрақтандыру мақ­сатында қаламыздың үш база­рында апта сайын өткізіліп тұрады. Жәрмеңкеге белгіленген алты ауданнан бөлек, қаланың кәсіпкер­лері де қатысты. Осы жәрмеңкеде негізінен ет, сүт, бал, балық өнімдері көбірек саудаланды. Өнімдер­дің ба­ғасы нарықтағыдан анағұрлым арзан, – деді облыстық ауыл шаруа­шылығы және жер қатынастары басқармасының басшысы Мейрам Меңдібаев.

Сонымен қатар жәрмеңкеге келушілерге облыстың өнер ұжымдарының қатысуымен концерттік бағдарлама да ұйымдастырылды.

Ләзиза МЫРЗАНТАЙҚЫЗЫ,

“Soltüstık Qazaqstan”.