Soltüstık Казахстан
Петропавлдық дизайнер Айжан Колчина Парижде өткен сән апталығына қатысып, талайды тәнті етті. “Оrientel Fashion Show” сән апталығына әлемнің түкпір-түкпірінен дизайнерлер қатысқан. Көпшілігі Шығыс елдеріндегі сән саласының мамандары екен. Жерлесіміздің “Феникс” топтамасы сәнқойлардың көңілінен шыққан.
Дизайнер топтамаға енген оннан астам кеш көйлегін екі айдың ішінде тігіпті.
– Менің бұл коллекциям өзімшілдікке толы. Тіршіліктің түрлі кезеңдері сипатталады. Ең алдымен, ақ көйлек киген қыз шығады. Ақ көйлек – өмірдің басталуы, пәктіктің, адалдық және аңғалдықтың белгісі. Одан соң біртіндеп киімдердің түсі қанық бола бастайды. Соңына қарай қара түсті көйлек көрсетіледі. Бұл – Феникс құсының жұмыртқаны жарып шығуының белгісі. Ең соңында түсі көздің жауын алатын қызыл көйлек ортаға шықты. Яғни “Феникс” құсы дүниеге келді, – дейді Айжан Колчина.
Қызыл көйлек 2 бөліктен тұрады. Үстіңгі жағы әсем тастармен сәнделген, ал белдемшесі ұзын және кең.
Сән үлгілерін пішкеннен бұрын керекті материалды табудың өзі қиын. Киімге қажетті заттарды Астана, Қарағанды және көршілес Ресейдің қалаларынан алдыртады екен.
– Мен көйлек тікпестен бұрын сол көйлекті өзімнің киіп тұрған сәтімді елестетемін. Көзімді жұмып қиял әлеміне батамын. Оны киген кезде еркіндік, жайлылықты сезінуіміз керек. Ең бастысы, сенімділік керек. Үш жасымнан бастап қолыма ине ұстадым. Қуыршақтарды киіндірген ұнайтын. Бала кездегі арманым – Парижге бару еді. Сүйікті кәсібімнің арқасында шетелге шықтым, арманым да орындалды, – дейді дизайнер.
Диас АЯҒАН,
“Soltüstık Qazaqstan”.