Soltüstık Казахстан
Қызылжар ауданындағы “Абакшино” демалыс аймағында оқыс жағдай орын алып, салдарынан ер адам ауруханаға жеткізілді. Мұндағы хайуанаттар бағындағы аюлардың бірі осындағы қызметкердің денсаулығына зақым келтірді. Оқиға темір тордың арғы жағындағы жыртқышты тамақтандыру кезінде болған. Зардап шеккен адам – 43 жаста. Хайуанаттар бағында бір ай да жұмыс істеп үлгермеген қызметкердің қолын жыртқыш аң ауыр жарақаттапты. Оқиға орнына он минутта жеткен “Жедел жәрдем” мамандары ер адамды тез арада облыс орталығына жеткізген. Соған қарамастан дәрігерлер оның бір қолын кесіп тастауға мәжбүр болды. Бүгінде мамандар науқастың екінші қолын аман алып қалудың жолын қарастырып жатыр.
“Абакшино” демалыс аймағындағы хайуанаттар бағында 3 аю бар. Әзірге зардап шегушіге оның қайсысы тұра ұмтылғаны белгісіз. Аталған оқиға бойынша сотқа дейінгі тергеп-тексеру жүргізілуде.
Диас АЯҒАН,
“Soltüstık Qazaqstan”.