Құшағымыз айқара ашық

Soltüstık Казахстан

 Kyzylzhar_akparat@mail.ru

Шіліңгір шілде айында “Отан­дастар” қорының ұйымдасты­руы­мен Моңғолияда тұрып жатқан қазақтардың кіші құрылтайы өтіп, оған қатысу бақытына ие бол­дық. Аталмыш іс-шара аясында рес­публика жоғары оқу орындарының білім көрмесі ұйымдастырылып, М.Қозыбаев атындағы Солтүстік Қа­зақстан университетінің “Founda­tion” факультеті этникалық қазақ жастарын Қызылжар өңірінде білім алуға шақырды. Жергілікті БАҚ-тар­ға ақпараттық хабарландырулар орналастырылып, Баян Өлгей аймағы білім басқармасының қолдауы­мен түсіндіру жұмыстары жүр­гізілді. Екіжақты кездесулерде қос мемлекет арасындағы білім сала­сының мәселелері айтылып, ата-аналар мен талапкерлерге танымдық кеңестер берілді. “Отан­дастар қоры” КеАҚ президенті Аб­зал Сапарбекұлы, Қазақстанның Монғолиядағы елшісі Ғабит Қой­шыбаев, Парламент Мәжілісінің де­пу­таттары Үнзила Шапақ, Нұргүл Тау, Жарқынбек Амантай, “Прези­дент және халық” газетінің бас ре­дакторы Марат Тоқашбаев, жазу­шылар Кәдірбек Құныпия, Ауыт Мұқитбек, Түркияның Мимар Синан университетінің профессоры Абду­луақап Қара мазмұнды әңгімеле­рімен, ойлы ұсыныстарымен құ­рылтай шырайын аша түсті.

Мұны айтып отырғаным, 1991 жылы шеттегі қандастарды елге ша­қыру саясаты басталғалы еліміздің білім жүйесіне өрелі өзгерістер енгізіліп, жоғары оқу орындарының базасында ұлты қазақ шетел аза­маттарына арналған дайындық бөлімдері жұмыс істей бастады. Тарихи Отанына, атажұртына келіп, білімдерін жетілдіріп, сосын уни­верситет, колледж және тағы басқа білім ордаларына таңдаған маман­дықтары бойынша тегін білім алу­ларына жағдай жасалды, жолдама алу мүмкіндіктеріне ие болды. Жа­ңашыл бастама аясында М.Қозы­баев атындағы СҚУ-де жүздеген қаракөз жастарымыз бақтарын сынап, сынақтан ойдағыдай өте білді.

2016 жылы дайындық бөлімі факультет болып құрылып, “Foun­dation”, – деген мәртебе алды. Сол уақыттан бері жұмысымыз тіпті жанданып, тәжірибеміз толысып, жылына кемінде білімге құштар 45-50 үміткерді оқуға қабылдап жүрміз. Факультеттің басты ерекшелігі – тыңдаушылар 9 ай бойы шәкіртақы алып, жатақханамен қамтамасыз етіледі. Осылайша жаңа ортаға бейімделе отырып, жоғары білім алуға арналған ұлттық бірыңғай тестілеуге жан-жақты дайында­лады.

“Foundation” факультетінде Қытай, Моңғолия, Өзбекстан елдерінен келетін жастардың үлесі басым. Сондай-ақ Ираннан, Түркі­менс­таннан да қызығушылық та­нытушылар бар. Көршілес Ресей Федерациясынан да хабарласу­шылар аз емес. Оқуға түсу талаптары қарапайым әрі қолжетімді. 5-тамыз бен 5-қыркүйек аралығында Ғылым және жоғары білім ми­нистрлігінің арнайы тұғырнамасына онлайн режімінде тіркелсе жеткі­лікті. 10-15 қыркүйек аралығында қабылдау әңгімелесу, сұхбат түрін­де өтеді. Оқу 1 қазан күні басталып, 9 айға созылады. Шәкіртақы, жа­тақхана беріледі. Оқу жүйесі ЖОО-ға бакалавр білім беру бағдарламасына грант негізінде оқуға тү­суге арналған ұлттық бірыңғай тест негізінде жүргізіледі.

Тыңдаушылар таңдаған маман­дығына сәйкес ҰБТ тапсырып, 4 пайыз жеңілдікке ие болады. Біздің факультетті аяқтаған тыңдаушы­лардың 80-95 пайызы студент ата­нып жүр. Тағы бір жеңілдік, 4 жыл оқып, одан кейінгі өмір жолын жас маман ретінде Мағжан елімен бай­ланыстырса, мемлекеттік квотаға орай әлеуметтік қолдаулар (тұрақты тіркеу, қандас мәртебесі) көрсе­тіледі.

Осы себепті тағдырдың тәлкегі­мен сыртқа кетіп, сол жақта орны­ғып қалған қазақ отбасыларының өскелең буын ұрпақтарын қуанышпен қарсы алуға құшағымыз әркез ашық.

Алмагүл АВДОЛХАНҚЫЗЫ,

М.Қозыбаев атындағы СҚУ-дың “Foundation” факультетінің деканы.