Soltüstık Казахстан
Жамбыл ауданындағы Питное көлінде биыл да балық қырылды. Тиісті ведомстволардың мамандары оқиға орнына барып, неден өлгенін анықтау үшін сынама алды.
Облыстық экология департаменті баспасөз қызметінің мәліметінше, 1 тамыз күні балықтың қырылғандығы туралы ақпарат түсісімен жауапты органдардың қызметкерлерінен жұмыс тобы құрылып, олар Питное көліне барған.
Мамандар көлдің жағалауын тексерді, алдын ала есеп бойынша, шамамен 100 кг астам мөңке, алабұға балығы қырылған. Су жәндіктерінің неден өлгенін анықтау үшін көл суының сынамасы, сондай-ақ өлген балықтар зертханалық сараптама жүргізу үшін алынды. Қырылған балықты Кладбинка ауылдық округінің әкімдігі жинап жойды.
Осыдан үш жыл бұрын да Питное көлінде балық қырылып, жарты тоннаға жуық мөңкенің өлексесі табылған еді. Мамандар ол жолы да тексеру жүргізіп, нәтижесінде балықтың көл түбіндегі күкіртсутектен өлгенін анықтаған еді.
Ақерке ДӘУРЕНБЕКҚЫЗЫ,
“Soltüstık Qazaqstan”.