Soltüstık Казахстан
Сәбит Мұқанов атындағы облыстық ғылыми-әмбебап кітапхананың қоры жаңа кітаптармен толықты. Кітапхана ұжымы онлайн шолу өткізіп, оқырмандарды жаңа туындылармен таныстырды.
Кітапхананың ұлттық бөлімінің қызметкері Дамира Серікбаеваның айтуынша, ай сайын жаңа кітаптарға шолу жасалып, таныстырылым өткізіледі. Бұл жолы оқырмандардың қолына тиер туындылардың арасында Ахмет Кенесарыұлының “Кенесары хан уа сұлтан Сыдық” кітабы, Зияш Телеуованың “Бет перде” атты шытырман оқиғалы көркем әдебиеті, белгілі жазушы Әділбек Ыбырайымұлының “Кезбе бұлттар” романы, Кейн Сьюзанның мінез ерекшеліктерін артықшылық ретінде пайдалану жолдарына арналған “Интроверт” кітабы, мұғалімдерге арналған “Педагогика, оқыту әдістемесі пәні. Теориялық түсініктемелер мен тест тапсырмалары” оқу-әдістемелік құралы және басқа да авторлардың кітаптары бар.
Сәбит Мұқанов атындағы облыстық ғылыми-әмбебап кітапхана – өңірдегі қалалық және аудандық кітапханалар үшін әдістемелік орталық болғандықтан, осындай шараларды ұйымдастыруды дәстүрге айналдырған. Бүгінде кітапхана қорында 500 мыңнан аса кітап бар. Соның ішінде сирек және құнды басылымдар қоры 3 мыңнан асады. Бұл сирек басылымдарды негізінен көне кітаптар дүкендерінен алады не болмаса оқырмандар сыйға тартады екен.
Аманжол ЗАҒЫПАР,
“Soltüstık Qazaqstan”.