Soltüstık Казахстан
“Білгенім – бір тоғыз, білмегенім – тоқсан тоғыз”, – деген ұстанымдағы өңірдің агрономдары жергілікті университеттің партасына қайта жайғасты. Бүгінгі ғылым мен техниканың көз ілестірмей дамыған заманында білімің мен білігіңді жетілдіру артық етпейді.
Саладағы жаңа әдіс-тәсілдерді меңгеру үшін біліктілікті арттыру курсы ашылады дегенді естіп келгендердің қарасы қалың. Оларға дәріс оқыған М.Қозыбаев атындағы Солтүстік Қазақстан университетінің ғалымдары өндірісте тәжірибелері бар мамандарға өздерінің ғылыми тұжырымдамаларын таныстырды.
Оқыту бағдарламасы екі кезеңге бөлінген. Курсқа қатысушылар теориялық білімдерін алқап басында өткен тәжірибе сағаттарында шыңдап, емтихан тапсырды. Сүрінбей өткендер сертификатқа ие болады. Бұл құжат үш жылға жарамды.
Қолына құжат тиген мамандар агроном-апробатор атанды. Оның негізгі міндеті – алқаптарды зерттеу. Яғни маман танапта таралуы мүмкін аурулар мен зиянкестерді, өсуі ықтимал арамшөптерді күні бұрын анықтап, ақыл-кеңес береді. Мұндай дерек алтын дән қамбаға құйылғанша дейін қам жейтін диқандарға ауадай қажет екендігі сөзсіз.
Екі апталық курс жыл сайын ұйымдастыралады. Биыл оған 20 адам қатысты. Былтыр біліктілікті арттыруға ниеттілер саны едәуір көп болыпты. Университет ауыл шаруашылығы және жер қатынастары басқармасымен тығыз қарым-қатынас орнатып, солар арқылы жазғы оқытуға агрономдарды шақырды. Арасында саланың жілігін шағып, майын ішкендермен қатар, ауыл шаруашылығындағы жауапты істі енді қолға алғандар да бар.
Байболат ҚҰЛТАНОВ.