Soltüstık Казахстан
Ақпарат және қоғамдық даму министрлігі биылдан бастап 12-ші тамызды жастар күні етіп бекітті. Бұл күні елімізден бөлек әлем жұртшылығы халықаралық жастар күнін атап өтеді. Көп жылдан бері атаусыз қалған мереке биыл қайта жанданып, еліміздің әр өңірінде фестивальдер, концерттер, жәрмеңкелер, қайырымдылық шаралары ұйымдастырылды. Осылайша жастар күнін атап өту бір аптаға жалғасты.
Өңір жастары республикалық апталыққа қатысып, бірқатар игі істерге ұйытқы болды. Жастар апталығы өңірдегі қайырымдылық ұйымдары мен жастар ресурстық орталықтары қатысқан “12 игі іс” атты акциямен басталды. Оның аясында белсенділер облыс орталығындағы қарт адамдарға көмек көрсетіп, жануарларға арналған орынға жәрдем берді. 300 жануарға шақталған “Белый бим” қабылдау орны бүгінде лық толы. Мұндағы қызметкерлер ерікті жастарды қуана қарсы алып, алғыстарын білдірді. Еріктілер иесіз ит пен мысықтарға арнап азық ала келіпті.
Апталық аясында қаланың орталық алаңында ақпараттық акция өтіп, жастарды толғандырып жүрген сұрақтарға жауап берілді.
– Ел дамуындағы қозғаушы күш – жастар. 12 тамыздың жастар күні ретінде белгіленуі еліміздің жастар саясатына ерекше мән беріп отырғанын көрсетеді. Осыған орай біздің өңірде де бірқатар шаралар өтуде. Мысалы, бұл акцияда біз жас тұрғындарға мемлекеттік бағдарламалар туралы ақпарат беріп, жұмыс табу, кәсіп бастау, баспаналы болудың жолдарын көрсеттік, – дейді қоғамдық даму орталығының жастар бастамалары бөлімінің басшысы Анастасия Волкова.
Әлеуметтік шаралардан бөлек, жастар апталығында мәдени, спорттық, интеллектуалдық сайыстар да ұйымдастырылды. Белсенділер Абай ескерткішіне гүл шоқтарын қойып, ақын өлеңдерін оқыды, хәкімнің атымен аталған көшенің бойында флешмоб өткізді. Ал арт-орталықта білгірлердің басы қосылып, интеллектуалдық ойынның көрігі қызды. Спортсүйер жастар үшін футболдан турнир өтіп, командалар өзара мықтыны анықтады. “Amanat” партиясы “Жастар рухы” жастар қанатының облыстық филиалында да жастар күні аталып өтіп, жастар саясатына өзіндік үлесін қосып жүрген белсенділер марапатталды. Жастар апталығына орай концерттер мен ірі шаралар өтпесе де, белсенділер мен еріктілер өздері бас қосып, игі істерді жүзеге асыра білді. Жастар ұйымдары мен ресурстық орталықтар да бірлесіп, мерекенің барынша пайдалы әрі қызықты өтуіне атсалысты.
– Өңірде екі қолға бір күрек таппай, аяққа тұра алмай жүрген өрендер қаншама. Біздің жұмысымыздың бір бағыты – осындай санаттағы жастарға көмек беру. Ал мерекеге орай жарияланған жастар апталығы осы жұмысымызға қарқын қосты. Біз бір апта бойы қайырымдылық акцияларын, қызықты сайыстарды, кеңес беру шараларын ұйымдастырдық. Осы істердің бәріне қолдау білдіріп, жастар апталығының өз деңгейінде өтуіне үлес қосқан түрлі ұйым өкілдері мен белсенді қатарластарыма алғыс айтамын, – дейді қалалық жастар ресурстық орталығының директоры Дамир Абдин.
Диас АЯҒАН,
“Soltüstık Qazaqstan”.