Soltüstık Казахстан
Ел спортының еңсесін көтеру үшін алдымен ауылдық жерлердегі жағдайды түзеу керек екенін біздің облыс басшылығы ісімен дәлелдеп келеді. Айталық, өңіріміздің орталығынан шалғай жатқан Ақжар ауданында ауыл спортына айрықша көңіл бөлініп отыр. Су жаңа спорт ғимараттары салынып, аймақтың намысын республикалық және халықаралық деңгейде қорғайтын спортшыларға жағдай жасалуда.
Талшық ауылындағы балалар мен жасөспірімдерге арналған спорт мектебі сонау Кеңес одағы тұсында, яғни 1974 жылы ашылған болатын. Сол уақыттан бері талай қиыншылықтарды бастан кешті. Тоқырау жылдары қарамағымызда еңбек еткен қаншама бапкер қалаға кетті. Бірі Петропавл жаққа ойысса, екіншілері іргеде тұрған Көкшетауға көшіп жатты. Десе де туған жерінің тағдырын ойлаған азаматтар елді мекенде қалып, ауыл спортын көтеруге ат салысты. Өңір экономикасы төмен құлдилаған тұста да есігіміз жабылмады, заман ағымына ілесіп, чемпиондарды өсіру үшін тапжылмай еңбек еттік. Соның арқасында жеткен жетістіктерімізбен мақтана аламыз.
“Талапты бала – талпынған құстай, құмары қанбас, аспанға ұшпай”, – демекші дарынды жеткіншектеріміз биік белестерді бағындырды. Мектебіміз бір орында тұрып қалмай, ілгері қарай қадам басты. Мұны ұжымның арқасы деп білемін. Бүгіннің өзінде 10 спорт түрінен үйірмелер жұмыс істеп тұр. Бокс, грек-рим, еркін және қазақ күресі, волейбол, футбол, жеңіл және ауыр атлетика, шаңғы спорты, шайбалы хоккейді ерекше айтуға болады. Қуантарлық жайт, соңғы жылдары салауатты өмір салтын ұстанушы жандар қатары артты. Мектебімізде ұзын саны 646 бала жаттығады. Тәрбиеленушілеріміз облыс намысын дүбірлі додаларда абыроймен қорғап жүр.
Өткен мен бүгінгіні салыстырсақ, айырмашылық жер мен көктей. Кезінде пешті өзіміз жағуға мәжбүр болдық, бүкіл ұжымның ынта-жігері мен адалдығының арқасында біз тәрбиеленушілер айналысатын бөлмелерде қалыпты температураны ұстап тұра алдық. Еңбегіміз зая кетпеді деп есептеймін. Кейін ел экономикасы түзеліп, әлеуметтік салаға қаржы бөлінген шақта спорт та алға қадам басты. Бұдан бөлек, спортшыларымыздың ірі жарыстарға қатысуы үшін демеушілік жасап жүрген түрлі қалталы азаматтардың еңбегін атап өткен жөн.
Ақжар ауданындағы спорт мектебінде қызмет етіп келе жатқаныма 40 жылдан асты. Осы уақыт аралығында талай мықты спортшыларды даярлап шығардық. Білікті бапкерлердің арқасында олар түрлі жарыстарда топ жарды. Материалдық-техникалық базамыз нығайған соң, шәкірттеріміз халықаралық додалаларда жақсы нәтижелерге қол жеткізе бастады.
Өз басым еңбек жолымды жаттықтырушы-оқытушы болып бастап, спорт мекемесінде әлі күнге дейін қызмет етудемін. Өткен жылдарға қарасам, еш өкінбеймін. Ізімді басып келе жатқан жас бапкерлер де жетерлік. Қазіргі уақытта 22 жаттықтырушы жұмыс істейді. Басым бөлігі – жоғары санаттағы мамандар. Тәлімгер ретіндегі өмірлік ұстанымым “күрес еріксізден – жігерлі, қорқақтан – батыл, әлсізден – күштіні жасай алады” деген ұранға сай келеді.
Мектебіміздің атақ-даңқын барша әлемге танытқандардың қатарында күрестен халықаралық дәрежедегі спорт шебері Ақан Баймағанбетов, КСРО спорт шебері Төлеген Қожылдақов, Қазақстанның спорт шеберлері Дайыр Сербайұлы, Бөлеген Бейбітхан, ауыр атлетикадан екінші жасөспірімдер Олимпиадасының қола жүлдегері Жаслан Қалиев, биатлоннан әлем чемпионатының күміс жүлдегері Ілияс Жұмановтарды айтуға болады. Жалпы алғанда, Ақжар ауданының балалар мен жасөспірімдерге арналған спорт мектебінің жаттықтырушылары 20-дан астам Қазақстан Республикасының спорт шеберін, 4 халықаралық дәрежедегі спорт шебері мен спорт шеберлігіне үміткер 50 спортшыны баптап шығарды. Осыншама шәкіртті тәрбиелеу оңай жұмыс емес екені белгілі.
Соңғы жылдары қысқы спорт түрлерінен жерлестеріміздің асығы алшысынан түсіп жүр. Ақжарлық Александр Герлиц параспортшылар арасында мықтылығын әлемдік аренада дәлелдеді. Ол да – біздің мектептің түлегі. Әлі күнге дейін Талшықта жаттығады. Биік белестерді бағындыруына біздің мектебіміздің көмегі тигеніне қуаныштымын. Ауданымыздың, облысымыздың мақтанышына айналған атлеттің алда талай жетістіктерге қол жеткізетініне сенімдімін.
Спортты дамыту – мемлекеттік саясаттың негізгі бағыттарының бірі. Ауылды түрлендірудің, дамытудың бірден-бір жолы да – спорт саласын жаңа биіктерге шығару деп білемін. Мұның жарқын мысалы, біздің ауылда үлкен дене шынықтыру және спорт кешенінің ашылуы дер едім. Бұл көп адамды бұқаралық спортқа тартуға мүмкіндік береді. Жаңа дене шынықтыру-сауықтыру кешені жаңа чемпиондарды тәрбиелеуге септігін тигізетініне сенімдімін.
Мұхамед ШАПЕНОВ,
Ақжар аудандық балалар мен жасөспірімдерге арналған спорт мектебінің басшысы.