Soltüstık Казахстан
Жуырда 2023-2024 оқу жылына арналған білім гранты иегерлерінің тізімі жарияланған болатын. Ғылым және жоғары білім министрлігі баспасөз қызметінің мәліметінше, оқу гранттарын тағайындау конкурсына қатысу үшін 94 мың талапкер құжат тапсырған. Бұл көрсеткіш былтырғы жылмен салыстырғанда 14 мыңға артық.
М.Қозыбаев атындағы Солтүстік Қазақстан университетіне мемлекеттік гранттар республикалық комиссия отырысының қорытындысы бойынша берілді. Биыл бұл оқу орнына мемлекеттік грант бойынша 1000-нан астам студент қабылданбақ. Оның 500-і Аризона университетімен серіктестік бағдарламасын таңдапты.
Білім ордасы жанындағы қабылдау департаментінің директоры Гүлмира Оспанованың айтуынша, грантқа түскен талапкерлердің дені еліміздің өзге өңірлерінің түлектері. Олардың қатарында “Алтын белгі” иегерлері, халықаралық және республикалық олимпиадалардың жеңімпаздары, оқу үздіктері бар. Астана, Алматы, Шымкент қалаларынан, Абай, Ақмола, Ақтөбе, Атырау, Шығыс Қазақстан, Жамбыл, Жетісу, Қостанай, Қызылорда, Маңғыстау, Павлодар, Түркістан, Қарағанды, Батыс Қазақстан облыстарынан білім қуып келетіндердің дені Ұлттық бірыңғай тестілеуде 100-ден жоғары балл жинаған. Ең жоғары – 139 балл алған үміткердің таңдауы М.Қозыбаев атындағы СҚУ-ға түсіпті.
Алдағы оқу жылында өңірімізге халық тығыз қоныстанған және жаңадан құрылған облыстар үшін бөлінген гранттар бойынша Шымкент қаласы мен Түркістан облысынан 50-ге жуық өрен келмек.
Жоғары оқу орнында құжаттарды тапсыру 25 тамызға дейін жүзеге асырылады. Қазіргі уақытта мемлекеттік грант иегері атанған студенттерді жатақханамен қамту мәселесі шешілуде.
Ләзиза МЫРЗАНТАЙҚЫЗЫ,
“Soltüstık Qazaqstan”.