Soltüstık Казахстан
Өңірде заңсыз қоқыс алаңдары көбейіп барады
Өңірлік коммуникациялар қызметінде облыстың экологиялық мәселелеріне арналған брифинг өтті. Облыстық экология департаментінің басшысы Азамат Бектасов өткен 8 айды қорытындылап, атқарылған жұмысты, алға қойылған міндеттерді саралады.
Өңірде шешімін таппай келе жатқан өзекті мәселелердің бірі – рұқсатсыз пайда болған қоқыс алаңдары. Биыл қоқыс төгетін 242 орын анықталса, соның 172-сінің рұқсат құжаттары жоқ. Тағы 70 полигонның шекарасы бұзылып, қоқыс төгіліп жатыр.
“Бүгінгі таңда рұқсатсыз пайда болған 186 полигон жойылды. Ал шекара сызығынан асып кеткен 70 полигонның 59-ы ретке келтірілді. Қоқыс үйінділерін анықтауда “Қазақстан Ғарыш Сапары” Ұлттық компаниясы” акционерлік қоғамы түсірілімдерінің көмегі зор. Сонымен қатар мобильді жұмыс тобының мүшелері Петропавлдан 33 қоқыс алаңын анықтады. Облыстың аудандарында да жағдай мәз емес, Қызылжар ауданы бойынша – 13, Жамбыл, Есіл аудандарында – 1, Мамлют ауданы бойынша 12 заңсыз қоқыс полигоны табылды”, – деді Азамат Бектасов.
Бүгінгі таңда мобильді жұмыс тобы анықтаған 61 үйіндінің 26-сы жойылған. Жалпы өңірде қазір қатты тұрмыстық қалдықтарды төгетін 453 полигон бар. Оның 103-інде жер актісі жоқ, тек 11 полигонның ғана барлық тиісті рұқсат құжаттары бар.
“Облыстың экологиялық жағдайын жақсарту мақсатында жол картасы әзірленіп бекітілді, оған қоршаған ортаны қорғау жөніндегі 17 іс-шара кіреді. Биыл осы құжат аясында “Севказэнерго” акционерлік қоғамы қазандық агрегаттарының қыздыру беттерін қалпына келтіріп, күл ұстағыш қондырғылардың, ауа өткізгіштердің, газ өткізгіштердің тозған бөлшектерін жөндеді. Бұдан басқа мемлекеттік орман қоры аумағына ағаштар отырғызылды. Жоспар бойынша облыстың 9 ауданында қатты тұрмыстық қалдықтар полигонын салу көзделген. Шал ақын ауданының орталығы – Сергеевка қаласында кәріз желілері мен тазарту құрылыстары басталады”, – деді Азамат Бектасов.
Петропавлдағы тағы бір экологиялық мәселе – “Қызылжар су” жауапкершілігі шектеулі серіктестігінің иелігіндегі “Биотоған” сарқынды су жинағышы. Биологиялық тазарту жүйесінің болмауынан күкіртті сутек ауаға тарап, жаман иіс көктемде қала тұрғындарының мазасын алады. Толық механикалық және биологиялық тазарту кестесін іске қосқаннан кейін қала аумағына күкіртсутек иісінің таралуы азаяды. Мәселе толық 2027 жылы ғана шешілмек.
“Атмосфералық ауаның күкіртті сутегімен ластануын азайту мақсатында Жол картасына қосымша іс-шаралар енгізілді, бұл 2024 жылға дейін орындалады. Судың ластануын азайту мақсатында биотоғанға табиғи сіңіргіштік қасиеті бар жасыл микробалдыр – хлорелла жіберілді. 2021 жылдың тамызында “Су ғылыми-технологиялық орталығы” жауапкершілігі шектеулі серіктестігі хлорелла көмегімен сарқынды сулардың жинақтағышын биологиялық оңалтуды жүргізе бастады. Жобаның жалпы құны – 124606720 теңге. Бұл іс-шара қолданғаннан кейін оң нәтиже көрсетті. Мәселен, егер 2021 жылы Петропавл қаласында күкіртсутекпен атмосфералық ауаның жоғары ластануының 7 жағдайы тіркелсе, биыл мүлде тіркелмеген”, – дейді департамент басшысы.
Ақерке ДӘУРЕНБЕКҚЫЗЫ,
“Soltüstık Qazaqstan”.