Soltüstık Казахстан
Енді жүргізуші куәлігін алғаш рет алатын азаматтар “Мобильді ХҚКО” қосымшасы арқылы емтихан тапсыруға өтініш беріп, алдын ала кезекті брондай алатын болады. Бұл жаңашылдық уақыт үнемдеуге әрі МХҚО-дағы қызмет алушылардың ағынын азайтуға септігін тигізеді.
Ол үшін қолданушыға “Мобильді ХҚКО” қосымшасында “Бейне қызметті” таңдау керек. Бұл сервис қызмет алушыны МХҚКО операторымен байланыстырады. Одан кейін клиентке мемлекеттік бажды төлеуге немесе алдын ала төленген түбіртекті ұсынуға мүмкіндік беріледі. Төлем жасалғаннан кейін №073/у формадағы медициналық анықтаманың, автомектепті аяқтағаны туралы куәліктің, қызмет алушының суретінің сканерленген нұсқаларын және талапқа сәйкес қойылған қолтаңбаны сұрататын болады. Оператормен сөйлесу барысында аталған барлық құжатты диалогтық терезеде тіркеу қарастырылған. Айта кететін жайт, азамат өтінішті сәтті тапсырғаннан кейін, оған МХҚКО-ға алдын ала кезекті брондау үшін емтихан тапсыратын күн мен уақыт ұсынылады.
– Бұрын емтихан тапсыратын азаматтар өтініш беру және төлем жасау үшін МХҚКО-ға баруға міндетті болатын. Енді бұл қызметті үйден шықпай, онлайн алуға болады. Яғни бейнеқоңырау арқылы өтініш беріп және кезекті алдын ала брондайды. Одан кейін клиент МХҚКО-ға бекітілген уақытта келіп, емтихан тапсырады. Болашақта өтініш беру функциясын электронды порталға және екінші деңгейлі банктердің ақпараттық жүйелеріне енгізу жоспарда бар, – деді “Азаматтарға арналған үкімет” мемлекеттік корпорациясы басқарма төрағасы Сүйеніш Әбділдин.
Бұл қызметті “eGov mobile” қосымшасында да қолдануға болады. Ол үшін басты беттегі “БейнеХҚКО” батырмасын таңдау қажет.
Анар ҚҰСАНОВА,
“Азаматтарға арналған үкімет” мемлекеттік корпорациясы” облыстық филиалының баспасөз хатшысы.