ОРМАН – ЕЛДІҢ ДӘУЛЕТІ

Орман – табиғаттың ең қымбат қазыналарының бірі. Алайда уақыт өте келе ғаламшарымыздың биологиялық таза және қауіпсіз жасыл бөлігі қамқор, сенімді көмекшілер мен иелерін қажет ете бастады. Орман қорын күзетуді мемлекеттік орман шаруашылығы кәсіпорындары жүзеге асырады, олардың құрамына мемлекеттік орман күзетшілері, орманшылар, орман шеберлері, орман шаруашылығы инженерлері кіреді. Мамандардың қатарында нәзік жандар аз емес.

Олардың жасампаз еңбектері мен өңіріміздегі орман шаруашы­лы­ғын дамытуға қосқан орасан зор үлестері мақтауға лайық. Орманшылардың өмір жолдары қарапайым, бірақ өте маңызды құндылықтарды жү­зеге асырудың мысалы болып табылады. Әріптестерімнің дені жауапкершілік, өз жұмысына деген сүйіспеншілік, еңбекті құрметтеу, кә­сіби ынтымақтастық және өзара кө­мек деген сөздерді ұстанымдарына айналдырған. Олар бұл қағидалар­ды жас мамандардың санасына сіңі­ріп, табиғат жанашырларына тәлім­герлік етті. “Соколов” орман шаруашы­лығында қызмет атқарған Галина Доможирова мен Ольга Павлюктің, “Мамлют” орман шаруашылығында ең­бек еткен Вера Черкасова мен Зи­наида Зинченконың, “Жамбыл” ор­ман шаруашылығында жұмыс істеген Надежда Жевнодейдің, “Булаево” орман шаруашылығының дамуына атсалысқан Александра Таубе мен Нина Лобанчуктің есімдері әріптес­тері арасында ерекше ілтипатпен ата­лады.

Саналы ғұмырын орман шаруа­шылығы саласына арнаған Марина Подоксенова Есіл ауданында дүние­ге келген. Анасы кітапханашы, әкесі механик болған. Марина 6-сыныптан бастап табиғаттың таңғажайыптары туралы ойлана бастайды. Мектепті бітіргеннен кейін Боровск орман ша­руашылығы техникумына оқуға тү­седі. Оны бітірген соң туған жеріне оралып, “Ленин” орман шаруашылығы мекемесіне жұмысқа орналасады.

“Мен бала күнімнен табиғатқа жа­қын болдым. Жап-жасыл ағаштарды Жердің жүрегіне балайтынмын. Техникумда өте жақсы бағаға оқыға­ныма қарамастан білмейтінімнің көп екені аңғарылатын. Бұл ретте маған тәжірибелі әріптестерім көп қолдау көрсетті”, – дейді Марина Геннадьев­на.

Қазіргі уақытта ол облыстық та­биғи ресурстар және табиғатты пай­далануды реттеу басқармасында жұмыс істейді. Ағаштардың өсімін молайту және орман өсіру мәсе­лелерімен айналысатын бөлімге жетекшілік етуде.

Сала мамандарының басты мақ­саты – орман алқаптарының азаюы­на жол бермеу. Қанша ағаш кесілсе, соншасын қайта отырғызу маңызды. Еліміздің орман қорына соңғы 5 жыл ішінде 2 миллиард ағаш егіліпті. Бұл ауқымды жоба Мем­лекет басшысы Қасым-Жомарт То­қаевтың тапсыр­масы бойынша жү­зеге асырылуда. Жоба аясында 2021-2025 жылдарға арналған орманды көбейту және орман өсіру­дің кешенді жоспары әзірленді.

Соңғы 2 жылда орман қорын­дағы 2521 гектар аумаққа 10 миллионнан астам көшет отырғызылды. Мамандар ағаштарды кесу үшін ең алдымен оларды зерттейді. Апатты деп танылған ескі ағаштар кесіледі.

Мемлекеттік орман шаруашы­лығы кәсіпорындарында орманды пайдалану, кесудің мақсаты және ағаш кесу процестерін қамтамасыз ету мәселелерімен Роза Тілеуова, Зада Аманжолова, Евгения Здоровец, Елена Гайворон, Юлия Ковзалова айналысады.

Басқарманың бас маманы Ай­нұр Өмірзақованың міндетіне орман өрттерінің алдын алу, ағаштарды заңсыз кесуді болдырмау жұмыс­тары кіреді.

– Адамның өмірі табиғатпен тығыз байланысты. Біз табиғатты ластасақ оның зардабын өзіміз тар­та­мыз. Кейбір адамдар орманға ба­рып демалады да, қоқыстарын, от­тың қалдықтарын жинамай кетеді. Соның салдарынан ағаштар өрте­ніп, қурауда. Табиғатқа жанашыр болуды әр адам өзінен бастағаны жөн. Сонда ғана біз таза ауамен тыныстап, дүниенің тазалығын сезіне­міз, – дейді Айнұр Бекболатқызы.

Гүлфия Сәкенова болса “Орлиногорск” орман шаруашылығында орманды сақтау және қорғау мәсе­лелерімен айналысады. Оның жетекшілігімен орман күзетшілері күн сайын ауа райының қолайсыз­дығына қарамастан өз учаскелерін аралап, жасыл желектің жайқалып тұрғанына көз жеткізеді. Бұл салада жүрген нәзік жандар ағаштардың сырына қанық. Олар қай ағаштың адамға қалай әсер ететінін жақсы біледі.

 Сәуле СҮЛЕЙМЕНОВА,

орман шаруашылығы саласының ардагері.