Soltüstık Казахстан
Қазақстанда ауыл әйелдерінің бизнес бастамаларын қолдаудың Кәмшат Дөненбаева атындағы қоры құрылады. Бұл туралы “Ұлы дала” ауыл бизнесін дамыту қауымдастығының басшысы Ақмарал Бекмұрзаева мәлімдеді.
Ол статистика бойынша “Қарызсыз қоғам” бағдарламасына (халықтың қаржылық сауаттылығы жөніндегі жоба) қатысушылардың 68 пайызы əйелдер екенін айтты. Нәзік жандар мəселелерін шешу ғана емес, сондай-ақ өз табыстарын арттыру үшін де сарапшыларға жүгінеді.
Сондықтан кəсіпкер əйелдерге ауыл шаруашылығы кооперативтерін құрып, өз жобаларымен белсенді айналысуға мүмкіндік беру үшін қор құру ұсынылды. “Қолынан іс келетін ауылдағы əйелдер қаржыландырудың жеткіліксіздігі, кəсіпкерлік дағдылар мен білімнің болмауы сияқты мəселелерге тап болады. Көбінесе несие алу үшін олардың кепілге қоятын мүлкі болмайды, өйткені дүние-мүлік негізінен ата-енесінің немесе күйеуінің атына жазылады. Кепілге қояр мүлкі болса да, отбасы əйелдің бастамаларын құптамайды, оның бизнесін қолдамайды. Несиелік тарихы нашар əйелдер де бар. Олар не істерін білмейді. Сондықтан қор ауылдағы кəсіпкер əйелдерге көмек көрсету, гранттық, кредиттік қаржыландыру, сүйемелдеу, бизнес-жоспар жазу бойынша жауапкершілікті өз мойнына алады. Біз ауыл əйелдеріне қолдау көрсетіп, оларға шабыт беріп, ауылдық аумақтарды дамытудағы рөлін нығайтамыз. Елімізде гендерлік саясатты дамыту жəне қолдау бойынша көптеген бастамалар іске асырылуда, аталған қор барлық белсенді əйелдерді біріктіруге мүмкіндік береді”, – деп атап өтті қауымдастық басшысы.
Қор ауылдағы əйелдерге арналған ағартушылық қызметпен айналысуға, оларды қаржылық сауаттылық пен бизнес-үдерістерге үйретеді. Сондай-ақ қор ауыл əйелдерінің жетістіктерін көтермелеу жəне тану жөніндегі жыл сайынғы “Ауылдың 100 табысты əйелі” жобасын жүзеге асырады.
Әсет ҚАНАФИН.