Soltüstık Казахстан
Сәбит Мұқанов атындағы облыстық қазақ сазды-драма театрында Темірбек Жүргеновтің 125 жылдығына арналған Қазақстан драма театрларының XXІХ республикалық фестивалінің жабылу салтанаты өтті. Рухани шараға арнайы шақырылған меймандар, фестивальге қатысқан он театрдың өнерпаздары мен зиялы қауым өкілдері қатысты.
Салтанатты шара Сегіз сері атындағы қазақ халық аспаптары оркестрі орындаған “Шаттық Отаны” күйімен басталды. Оркестердің сүйемелдеуімен әнші, “Мәдениет саласының үздігі” төсбелгісінің иегері Динара Таушева “Қыз Жібек” операсынан “Жібектің ариясын”, Асхат Таушев пен Руслан Мұстафин “Попурри неаполитанских песен”, “Атамекен” әндерін орындады. “Сенситив” би ұжымы сахналаған “Абай жаны” хореографиялық қойылымы тәнті етті. Театр өнерпаздары Қасым Дүйсехан, Рүстем Арменұлы, Әлібек Малкаждар, Ернұр Аралтаев театр сыншысы, “Дарын” мемлекеттік жастар сыйлығының иегері Мирас Әбілдің Темірбек Жүргеновке арнаған өлеңін нақышына келтіріп оқыды.
– Қасиетті Қызылжарда өткізілген республикалық фестиваль өз мәресіне жетті. Еліміздің түкпір-түкпірінен келген театр әртістері бір апта бойы жергілікті көрерменге түрлі жанрдағы қойылымдарын ұсынды. Аталмыш іс-шара еліміздің мәдени өміріндегі ең елеулі, жарқын, әрі қызықты оқиғаға айналды. Сонымен қатар әр театр труппасының әлеуетін тануға, сахна тарландары арасындағы қарапайым қарым-қатынасты орнатып, нығайтуға тамаша мүмкіндік берді. Петропавлдағы қос өнер ордасының сахнасында өткен фестиваль мәдениетіміздің дамуына өз септігін тигізді, – деді Мәдениет және ақпарат министрі Аида Балаеваның атынан алғыс айтқан министрлік жанындағы Мәдениет комитетінің театр өнері басқармасының бас эксперті Мөлдір Ондасынова.
Шараға Астана, Алматы қалаларынан арнайы шақырылған қадірлі меймандар фестивальдің жоғары деңгейде өткенін атап өтті. Өңіріміздегі өнердің қос қарашаңырағы – Сәбит Мұқанов пен Н.Погодин атындағы театрларда алты күн бойы екі спектакльден қойылды. Фестивальдің өз деңгейінде ұйымдастырылуына жергілікті тұрғындар да атсалысты. Көрермендер залында ине шаншар орын болмағанын қалың бұқараның өнерге деген жанашырлығы деп бағамдадық.
– Министрлік бекіткен қазылар алқасы әр спектакльден соң талдау жұмысын жүргізіп, қойылымның маңызына, актерлердің шеберлігіне баға берді. Біз қазақ театр өнерінің қай бағытта дамып жатқанын аңғардық. Ауыз толтырып айтарлықтай жетістіктер аз емес екенін білдік. Қойылымдарды талқылау барысында айтылған сын-ескертпелер ескерілетініне сенеміз, – дейді қазылар алқасының төрайымы Бақыт Нұрпейіс.
Фестивальдің қорытындысы бойынша, “Мағжан” спектаклі үшін Түркістан облыстық музыкалық драма театрына облыс әкімінің арнайы сыйлығы берілді. “Темірбек Жүргенов” атындағы арнайы сыйлық “Қара шекпен” спектаклі үшін Бикен Римова атындағы Талдықорған драма театрына, қазылар алқасының арнайы жүлдесі “Шақан шері” спектаклі үшін Серке Қожамқұлов атындағы Жезқазған қазақ драма театрына бұйырды. “Екінші пландағы үздік әйел бейнесі” номинациясымен “Қорғансыздың күні” қойылымында Ғазизаның әжесінің рөлін сомдаған Нұрмұхан Жантөрин атындағы Маңғыстау облыстық музыкалық драма театрының актрисасы Анар Бейсенбина, “Екінші пландағы үздік ер адам бейнесі” номинациясымен “Мағжан” спектакліндегі Елтай рөлін сомдаған Түркістан музыкалық драма театрының әртісі Жандәулет Батай, “Үздік әйел адам бейнесі” номинациясымен “№37” спектакліндегі Зейнеп рөлі үшін фестивальге алғаш рет қатысқан “Шам” театрының актрисасы Зарина Кармен марапатталды. “Үздік ер адам бейнесі” номинациясы “Шал мен теңіз” спектакліндегі Сантьяго рөлі үшін Алматы қаласының Мемлекеттік қуыршақ театрының әртісі Бақытжан Каюовқа, “Үздік режиссерлік шешім” номинациясы “Ұждан” спектаклі үшін Жүсіпбек Аймауытов атындағы Павлодар облыстық қазақ музыкалық драма театрының режиссері Азамат Нигмановқа, “Үздік сценографиялық шешім” номинациясы “Атау кере” спектаклі үшін Сәкен Сейфуллин атындағы Қарағанды облыстық академиялық драма театрына табысталды. “Үздік спектакль” аталымын “Бернарда Альбаның үйі” қойылымымен көпшіліктің көңілінен шыққан Ғабит Мүсірепов атындағы қазақ мемлекеттік балалар мен жасөспірімдер театры жеңіп алды. Жеңімпаздар ақшалай сыйақы мен дипломдарға ие болды. Фестивальге қатысқан барлық театрға Темірбек Жүргенов атындағы қор төрағасы Сәпен Аңсаттың ұйытқы болуымен Ұлттық банк шығарған “Т.Жүргенов 125 жыл” мерейтойлық монетасы табысталды.
Самрат ҚҰСКЕНОВ,
“Soltüstık Qazaqstan”.
Суретті түсірген
Самат БАЙҒАЗЫ.