Soltüstık Казахстан
Өңірдегі бір кездері талан-таражға түсіп, оңды-солды заңсыз берілген жерлер қайтарылып жатыр. Облыс прокурорларының араласуынан кейін 247 жайылымдық жер мемлекет меншігіне берілді.
Облыстық прокуратураның мәліметінше, мамандар жер қатынастары саласына талдау жүргізу кезінде елді мекендерге жақын жайылымдардың жүйелі түрде заңсыз берілгендігін анықтады. Жергілікті атқарушы органдардың лауазымды тұлғалары Жер кодексінің талаптарын бұза отырып, ауылдарға жақын жердегі 348 жайылымдық учаскені заңсыз берген. Оның жалпы ауданы – 54 мың гектар.
Қадағалау органының шаралары бойынша облыс әкімдігі мен жер ресурстарын басқару департаменті сотқа талап қою арқылы ауданы 38 мың гектар жер учаскесін қайтарып алды. Қазіргі уақытта қалған жерлерді мемлекет меншігіне қайтару бойынша жұмыс жүргізіліп жатыр. Прокурорлардың ұсынымын ескерген әкімдік мамандары жайылым тапшылығын жою мақсатында елді мекендердің жер көлемін 114 мың гектарға ұлғайтқан, сондай-ақ агроөнеркәсіптік кешен субъектілерімен жайылымдарға қажеттілікті жоюға бағытталған меморандумдар жасалды.
Нәтижесінде өңірде ауыл халқы үшін жайылымдық жерлердегі тапшылық 538 мыңнан 386 мың гектарға дейін азайды.
Ақерке ДӘУРЕНБЕКҚЫЗЫ,
“Soltüstık Qazaqstan”.