Soltüstık Казахстан
“Аманат” партиясы “Жастар рухы” жастар қанатының белсенділері облыс орталығындағы тарихи-мәдени нысандардың маңайын жинастыру бойынша акция өткізді. Петропавл қаласының “Qyzyljar-Art” орталығына жиналғандар қоқыстарды, жапырақтар мен бұтақтарды жинап, жабдықтарды тасымалдауға көмектесті.
“Qyzyljar-Art” орталығы – өңірдегі көрнекті және заманауи мәдениет нысандарының бірі. Жазда ашық аспан астындағы павильонда көрмелер, концерттер мен шеберлік сыныптары өткізіледі. Жуырда жастар қанатының мүшелері бастама көтеріп, орталықтағы орындықтар мен сөрелердің орнын ауыстыруды, маңайын мұнтаздай етіп жинауды жоспарлаған. Мұндағы жұмыстарға қол ұшын беріп, еңбек еткен жастар орталықтың келесі маусымын асыға күтетіндерін жеткізді.
Аталған акция “Жастар рухы” жастар қанатының қолдауымен бүкіл республика бойынша өтуде. Бұған дейін ел жастары “Жұмбақтас” жартасын, “Бурабай” мемлекеттік ұлттық-табиғи паркін тазалауға қатысты. Игі іс “Аққайнар” петроглифтік кешені мен “Тамғалы-Тас” шатқалында да жүзеге асты.
Диас АЯҒАН,
“Soltüstık Qazaqstan”.