Soltüstık Казахстан
Президент “Әділетті Қазақстанның экономикалық бағдары” Жолдауында әрбір азаматымыз, әсіресе, жастар ең жақсы қасиеттерді бойына сіңіру қажеттігін алға тартып, әркім отаншыл, білімпаз, еңбекқор, адал, әділ, үнемшіл әрі жанашыр болса, алынбайтын асу жоқтығын ескертті. Қазақстан – жалғыз Отанымыз. Оның іргесінің берік, керегесі кең, төрт құбыласы түгел болуы – өз қолымызда. Қасым-Жомарт Кемелұлы әрбір азаматты осы қасиетті парыздарды адал атқаруға шақырып, берекелі бірлігімізді сақтап, табанды еңбек ете отырып, бабалар аманатына деген адалдықтан таймауға шақырды. Елімізде ішкі саясаттың негізгі бағыттарының бірі республика тұрғындары арасында бейбітшілік пен этносаралық келісімді қамтамасыз ету болып табылады. Бұл орайда конституциялық мәртебесі мен өкілдігі бар Қазақстан халқы Ассамблеясы ерекше рөл атқаратыны даусыз. Бүгінгі таңда ұлттық-мәдени орталықтарды, этнос өкілдерін біріктіретін бұл саяси құрылымның топтар мен мүдделер арасындағы тепе-теңдікті сақтау жолындағы тәжірибесі үлгі етуге тұрарлық. Екінші жағынан, институт билік пен этнос арасындағы диалог алаңы іспеттес. Этностардың проблемаларын жоғары билік деңгейіне жеткізіп, шешу мүмкіндіктері мол.
Ассамблея қоғамның әлеуметтік жаңғырту үдерістеріне де белсене араласып, білім берудің, денсаулық сақтаудың жаңа жүйесін дамытуға, ел этностарының мәдениеті мен дәстүрлерін сақтауға, ұлттық-мемлекеттік бірегейлікті қалыптастыруға, мемлекеттік тілді, халықтың толеранттылығы мен бірлігін сақтау арқылы мемлекеттік тәуелсіздікті нығайтуға зор үлес қосып келеді.
Биыл Қазақстан халқы облыстық ассамблеясының өкілдері кәсіпорындардың, білім беру, денсаулық сақтау мекемелерінің ұжымдарында болып, этносаралық және конфессияаралық келісімді насихаттау бойынша жүйелі жұмыстарды одан әрі жалғастырды. Этномәдени бірлестіктер мен этнос өкілдерінің мемлекеттік тілді меңгеруіне ерекше көңіл бөлінді. Мемлекеттік тілді үйреніп жүрген және жетік меңгерген өзге ұлт өкілдерінің қатысуымен “дөңгелек үстелдер”, тіл фестивальдерін, конкурстар өткізу дәстүрге айналды. Жас ұрпаққа мәдениетаралық диалог, достық және ынтымақтастық қағидаттарын қалыптастыру мақсатында тренингтер, дәрістер, семинарлар мен конференциялар өткізілді.
Солтүстік Қазақстан көп этносты өңірлердің бірі саналады. Ассамблеяның алдағы қызметі бейбітшілікті, достық пен ізгілікті нығайтуға бағытталып, ұлттық бірлік пен қоғамдық келісімнің озық үлгілері кеңінен насихатталатын болады. Достық пен ниеттестік қағидаттары – бұлжымас мақсатымыз.
Айым МҰҚЫШЕВА,
“Қоғамдық келісім” КММ-нің бас сарапшысы.