ТУҒАН ЖЕРІН ТҮЛЕТКЕН

Мағжан Жұмабаев ауданындағы Сулышоқ ауылы бес жылдың ішінде болашағы зор елді мекендердің қа­та­рына қосылды. Осы аралықта ауылда жаңа тұрғын үйлер бой кө­теріп, әлеуметтік нысандар пайда­ла­нуға берілді. Жол жөнделіп, ауыл­ға таза су тартылды. Тұрмысқа жай­лы жағдай жасалғандықтан мұндағы халық саны үш есе өсті. Ауылдың көркеюіне жергілікті кәсіпкер Қайрат Жәнібековтің қосқан үлесі зор.

“Мектепті бітірісімен Петропавл­дағы ауыл шаруашылығы технику­мы­на оқуға түсіп, техник-механик ма­мандығын алып шықтым. Ауыл ша­руашылығы саласында жүргеніме 27 жыл болды. Тоқсаныншы жылдар болатын, кеңшарлар құрып, ерте­ңі­міз бұлыңғыр кез. Отбасымызға 76 гектар жер бұйырды, көп ұза­май біз егін егуді бастадық. Қиын­дықтарға мойымадық, ерінбедік. Көп өтпей қа­тарымызға шағын шаруа­шылықтар қосылды. Нәтижесінде “Агро-Комп­лекс-Сулышоқ” жауапкершілігі шек­теулі серіктестігін құрдық”, – дейді ол өткен күндерді ес­ке алып.

Қазір серіктестіктің иелігінде 1184 гектар жер бар. Негізінен би­дай, арпа, сұлы егеді. Мамандар егіншілікті ғана емес, мал шаруа­шылығын дамытуға да басымдық бе­руде. Жуырда фермаға симментал тұқымды ірі қара жеткізілген.

Сулышоқ – бүгінде 300-ге жуық тұрғыны бар, өмірі қыз-қыз қайнаған елді мекен. Бұл – орасан еңбектің нә­тижесі. Жақында ол да көптеген қазақ ауылының кебін киіп, құрып кетудің аз-ақ алдында болған екен.

“2017 жылы бала санының азды­ғына байланысты мектеп жабылады деген хабар жетті. Анық-қанығын біл­мек болып бірден әкімдікке хабар­ластым. Олар бұл ақпаратты раста­ды. Ондағы мамандар халықты жұ­мыс күші көп өңірлерден солтүстік облыстарға көшіретін бағдарлама бар екенін айтты. Дәл сол күні ау­данға жеті баласы бар бір отбасы ке­ліпті, аудан орталығындағы қонақ­үйге орналасқан екен. Ауылға алып келдім. Оларға ауыл ұнады, қалатын болды. Сөйтіп, біздің мектептегі бала саны 14-ке жетті”, – дейді кәсіпкер. 2018 жылы ауылға төрт баласы бар тағы бір отбасы көшіп келген. Алайда әкімдіктегілер, бала саны­ның межелеген нормаға жетпейтінін айтып, мектептің есігіне қара құлып салынатынын тағы бір мәрте ескерт­кен. Білім ошағы жабылса, ауылдың да іргесі сөгілетінін білген Қайрат Сапарғалиұлы облыс әкімінің сол кездегі орынбасары Айдарбек Сапа­ровтың қабылдауында болып, жағ­дайды түсіндірген. Айдарбек Сей­піл­ұлы 30 бала болса мек­тептің жа­былмайтындығын жеткі­зіпті.

2019 жылы шаруашылық есе­бі­нен қоныс аударушыларға бес үй са­лынған. Бюджет есебінен қосымша 5 үй тұрғызылды. Осылайша бір жаз­да ауылда 10 жаңа үй пайдалануға берілді. Жайлы жағдай жасалғаннан кейін Сулышоққа қоныс аударуға ниетті отбасылар саны молайған. “Содан бері ауылымызға 24 отбасы қо­ныс аударған екен. Оларға бес жылдың ішінде жаңа 20 баспана берілді”, – дейді кәсіпкер.

Сулышоқ ауылына қоныс аудар­ғандардың ішінде мұғалімдер де бар, олар жергілікті мектепке жұ­мыс­қа орналасқан. Ветеринар, электрик сынды өзге де мамандық иелері ша­руашылықта жұмыс істеп жатыр. Қа­зір серіктестікте кадр тап­шылығы жоқ, көшіп келген адамды жұмысқа қабылдауға әзір. “2017 жылы (сту­дент­термен қоса есепте­генде) Су­лы­шоқта 76 адам болған. Қазіргі уақытта тұрғындар саны – 266. “Ең­бек” бағдарламасымен 24 отбасы көшіп келген. Серіктестік бо­лашақта қоныс аударушыларға тағы 10 үй са­лып беруді жоспарлап отыр. “Бұл ал­дағы үш жылға арналған жоспары­мыз. “Қазір 50/50 бағдарла­масы бар, шығынның жартысы мемлекет есе­бі­нен өтеледі”, – дейді Қайрат Жәні­беков.

Серіктестік басшысы қоныс аударған отбасыларды үймен ғана емес, төрт түлікпен де қамтамасыз етуде. Тұрғындарға үш жылға сиыр беріледі. Олар төлін өздеріне алып қа­лып, сиырды уақыты келгенде қайтарып беруі керек.

“Былтыр Мәдениет үйін салдық. Қазір барлық мерекелерді осы клуб­та өткіземіз, жастарға арналған би кештері ұйымдастырылады. Әлеу­меттік нысандар ашылуда, мұның бәрі қосымша жұмыс орны ғой. Апат­тық жағдайда тұрған мектепті күр­делі жөндеуден өткіздік. Жиһазы, асхананың жабдығы жаңадан алын­ды. Биыл балабақша құрылысы жү­ріп жатыр, оны жыл соңына дейін пайдалануға береміз. Медициналық пункт жұмыс істейді”, – дейді кә­сіпкер.

Туған жеріне жанашыр жан мек­тепті үздік оқыған оқушылардан да қолдауын аяған емес. Білім ордасын жақсы бағамен аяқтаған 9 оқушыға асыл тұқымды ірі қара малдың бұ­заулары беріліпті. Бала санының кө­беюіне байланысты мектеп басшы­лығы оқушыларды екі ауысымда оқытатын болған. “Елді мекенге кең әрі жайлы мектеп керек. Бұл мәсе­лені көтергенімізге екі жыл болды”, – дейді Қайрат Сапарғалиұлы.

Кәсіпкердің айтуынша, қазақтың түп қазығы – ауыл. Осы байлығы­мызды сақтап қалуға міндеттіміз. Ол үшін халыққа жағдай жасау керек.

Серіктестік басшысының алға қойған мақсаттарының бірі – ауылда өндіріс орнын ашу. Мешіт салуды да жос­парлап отыр. Оған арналған учаске әзір тұр.

Ақерке ДӘУРЕНБЕКҚЫЗЫ,

“Soltüstık Qazaqstan”.