Жемқорлық деңгейі төмен

Өңірімізге жұмыс сапарымен Қазақстан Республикасы Сыбайлас жемқорлыққа қарсы іс-қимыл агенттігі превенция қызметінің басшысы Саян Ахметжанов келді. Ол қоғам, бизнес, мемлекеттік және құқық қорғау органдарының өкілдерімен кездесті. Алқалы жиынға облыс әкімі Ғауез Нұрмұхамбетов қатысты. Бұл күні сыбайлас жемқорлыққа қатысты мәселелер талқыға түсті.

Биыл мемлекет тарапынан ша­ғын және орта бизнесті қолдауға 81,2 млрд. теңге бөлінген. Бұдан бас­қа бизнес негіздеріне үйрететін көптеген бағдарламалар жұмыс істейді. Бүгінде бизнестің үлесі – өңірлік өнімнің кем дегенде 30, ал түскен салықтың 60 пайызы шама­сында.

“Кәсіпкерлік – экономикалық дамудың негізгі қозғаушы күштерінің бірі. Президент отандық бизнесті қолдау және дамыту мәсе­лесіне ерекше мән беріп отыр. Бүгінгі таңда облыста кәсіпкерлікті дамытудың оң нәтижелері байқалады. Мәселен, 2021 жылдан бас­тап кәсіпкерлік субъектілерінің саны 5 мыңға өсті, олардың әрқай­сысы кем дегенде 2-3 жұмыс орнын ашты. Мемлекет те өз кезегінде кә­сіпкерлерге барынша қолдау көрсе­тіп отыр”, – деді жиынға қатысқан облыс әкімі Ғауез Нұрмұхамбетов.

Жиында сөз болған негізгі мә­селе – сыбайлас жемқорлық. Саян Ахметжанов облысымызда сыбайлас жемқорлық тәуекелдерінің кар­тасы бойынша мониторинг жұмысы жүргізіліп жатқандығын атап өтті.

“Сыбайлас жемқорлық тәуекел­де­рінің картасын іске асыру мақса­тында еліміздің барлық облыста­рында 156 әлеуметтік нысан қамтыл­ды. Солтүстік Қазақстан облы­сында 4 әлеуметтік нысан бақы­лауға алынды. Бұл нысандарға 1,4 млрд. теңгеден астам қаржы бө­лінді”, – дейді елордалық мейман.

Сондай-ақ Саян Ахметұлы елі­міз­де “Бизнеске жол” жобасы жұмыс істеп жатқандығын айтты. Оның бас­ты мақсаты – кәсіпкерлердің құқықтарын қорғау және сы­байлас жемқорлық тәуекелдерін жою. Бүгінде бұл жоба аясында 580 мәселе шешіліп, 25 мың кәсіпкерге көмек көрсетілген.

“Биыл департамент мамандары 20-дан астам кездесу өткізді. Кәсіп­керлермен кездесу үшін барлық ауданды араладық. Осы жылдың 23 қаңтарында “Бизнеске жол” жобасы іске қосылған болатын. Кәсіпкерлер палатасымен бірлесе отырып 26 мәселенің шешімін тап­тық. 1300-ден астам кәсіпкердің құқығы қорғалды”, – дейді Сыбайлас жемқорлыққа қарсы іс-қимыл агенттігі облыс бойынша департаменті бас­шысының бірінші орынбасары Айдос Жүнісов.

Кәсіпкерлердің құқығы мен мүд­десін қорғау – кәсіпкерлер палатасы қызметінің негізгі міндеттерінің бірі. Осы жылы өңірлік кәсіпкерлер пала­тасына кәсіпті қорғау бойынша 114 өтініш келіп түскен екен. Оның 51 пайызының, яғни 59-ының нәтижесі оң. Қорғалған меншік құқығының со­масы – 267 млн. теңге. Бірақ әлі де шешуді қажет ететін мәселелер бар.

“Жедел шешуді қажет ететін мә­селе – қосымша құн салығы. Об­лыстың өзінде 4,5 млрд. теңге қосымша құн салығы мемлекетке қай­тарылмаған. Екінші мәселе – кадр тапшылығы. Қазіргі заманда техни­калық мамандықтарға сұраныс артқан. Ауыл шаруашылығына қажетті дәнекерлеуші, мал дәрігері, қасап­шы, бағбан секілді мамандар аздық етуде. Жұмыс күшінің тапшылығы бүкіл са­ланың дамуына кері әсерін тигізіп жатыр”, – дейді облыстық кәсіпкер­лер палатасы директорының орын­басары Жеңіс Қазиев.

Кеңейтілген отырыс барысында кәсіпкерлер де сөз алып, өз мәселелерімен бөлісті. Кәсіпкер Әйгерім Керейбаева өңірде ерекше күтімді қажет ететін балалардың реабилитацияға мұқтаж екенін айтты. “Бізге мамандар қажет. Оларды Астанадан арнайы шақыртуға болады. Бірақ олар айына бірнеше күнге ғана келуі мүмкін.   Бұл науқас сәбилерге аздық етеді. Олар көрсететін қызмет құны біздің ауруханалардағыға қарағанда арзандау.  Менің өзімнің жеке орталығым бар. Бірақ дамытуды қажет етеді. Арнайы орын жалдау қиын. Петропавлда қараусыз қалған үйлер, ғимараттар аз емес. Оларды жөндеп, орталық ашуға болар еді. Осы орайда маған қандай көмек көрсете алар едіңіздер?” – деді ол.

Бұл сұраққа облыстық кәсіпкерлер палатасы директорының орынбасары Жеңіс Қазиев жауап беріп, бұл мәселені назарға алатынын жеткізді. Жиын соңында өңір басшысы Солтүстік Қазақстан облысы сыбайлас жемқорлық деңгейі төмен өңірлердің қатарына кіретінін айтып, жауапты мамандарға бұдан да үздік нәтижеге қол жеткізу міндетін жүктеді.

Ақерке ДӘУРЕНБЕКҚЫЗЫ,

“Soltüstık Qazaqstan”.