Soltüstık Казахстан
Біздің облыста бүкіл Қазақстанға аты шыққан, “Үздік 30 ауыл” байқауының жеңімпазы болған ерекше елді мекен бар. Ауылдың басқалардан басты ерекшелігі – тұрғындарына жасалған жайлы жағдай.
Аққайың ауданына қарасты Дайындық ауылы Тәуелсіздіктің 30 жылдығына байланысты ұйымдастырылған “Үздік 30 ауыл” республикалық байқауының жеңімпазы атанды. Байқау шарты бойынша үздіктер қатарына кіру оңай болмады. Әрбір ауылдың өзіне тән ерекшеліктері болуға тиіс еді. Дайындық ауылы осы шарттардан сүрінбей өтті.
Мұндай жетістікке қол жеткізу үшін ауыл азаматы Біржан Шәймерденов көп еңбек сіңірді. Ол жаңа жұмыс орындарын құрып, ауыл тұрғындарына жайлы үйлер салды. Жас мамандарды баспанамен қамтамасыз етіп, ауылдың ішіндегі бүкіл жолды жөндеді. Осындай жұмыстарды атқаруға кәсіпкер жыл сайын 200 млн. теңгедей қаржы бөледі. Қазір Дайындық ауылында 240 адам тұрып жатыр. Барлығы да жұмыспен қамтылған. Ал өзге өңірлерден көшіп келгендерге Біржан ағамыз өз қаржысы есебінен үй салып беруде. Мәселен, соңғы 3 жылдың ішінде елді мекенде 30-ға жуық үйдің құрылысы аяқталды. Жақында қосымша 6 баспана пайдалануға берілмек.
Тәуелсіздігіміздің 30 жылдығына орайластырылған бұл байқаудан бөлек, арнайы анықтамалық альбом шығарылған еді. Бұл альбомға болашағы зор ауылдармен қатар оны көркейтуге үлес қосып жүрген ел азаматтарының аты да жазылды. Солардың қатарында Біржан Шәймерденов те бар. “Үздік 30 ауыл” анықтамалық альбомы ақын, “Тұлға-достық” қоғамдық қорының директоры Мұратхан Шоқанның бастамасымен жүзеге асты. Оған еліміздің 14 облысынан болашағы зор ауылдар кірді.
Біржан Шәймерденов республикалық “Жыл адамы”, “Жомарт жүрек” байқауларының жеңімпазы, туған ауылы үшін ерен еңбек етіп жүрген азамат. Оның бастамасымен ауылымызда мектеп, балабақша, спорт зал, монша, сауда үйі салынып, көлік жөндеу орны мен астық сақтайтын қоймалар ашылды. Жуырда ол баспанасы тозып, ескірген Марат және Күлбаршын Қуанышевтерге жаңа үй салып берді.
Таяуда мектебіміз күрделі жөндеуден өтті. Материалдық-техникалық базасы жаңартылып, жаңа заман талабына сай жабдықталды. Ауылда тұрғындардың алаңсыз өмір сүруі үшін барлық жағдай жасалған. Баспаналарға су құбыры тартылып, әрбір үй орталықтандырылған жылыту жүйесіне қосылған. Ағайын тұтынған суы үшін ақша төлемейді. Ауылымыздың тағы бір ерекшелігі – бізде той-жиындар арақ-шарапсыз өтеді. Дүкендерде алкоголь өнімдері сатылмайды. Жастарымыздың қаны бұзылып, санасы уланбасын деген Біржан Шаймерденовтің осы бастамасын ауыл тұрғындары қолдап, бір ауыздан келісті.
Өз ауылынан бөлек, Біржан Шаймерденов басқа аудандардың дамуына да ат салысып келеді. Қазіргі таңда Бескөл ауылында науқас балаларға иппотерапия емін жүргізу үшін жабық ипподромның құрылысын жүргізіп жатыр. Ауыл – азаматымен ажарлы. Біз туған жеріне жанашыр жанмен мақтанамыз!
Талғат РАМАЗАНОВ,
Дайындық негізгі мектебінің директоры.
Аққайың ауданы.