Soltüstık Казахстан
Өткен аптада өңірде қарлы дауыл салдарынан электр желілері үзіліп, бағандардың сынуына байланысты облыстың 183 ауылы жарықсыз қалған.
“Солтүстік Қазақстан электр тарату компаниясы” акционерлік қоғамы баспасөз қызметінің мәліметтеріне сүйенсек, жөндеу жұмыстарына барлығы 46 апаттық бригада мен 180-нен астам техника жұмылдырылған. Алайда жарық толық берілген жоқ. 16 ауылдың тұрғындары, яғни, 1175 абонент әлі күнге дейін жарықсыз отыр.
“Жөндеу жұмыстары Аққайың, Есіл және Мағжан Жұмабаев аудандарында жалғасуда. Ауа райының қолайсыздығына қарамастан дәл қазір 55 техника мен 41 маман қалыпқа келтіру жұмыстарын жүргізіп жатыр”, – делінген кәсіпорын таратқан мәліметте.
Қазіргі таңда арнайы бригадалар ауа райының қолайсыздығынан келген залалды анықтап, жөндеу жұмыстарын жүргізуде. Ең күрделі жағдай Мағжан Жұмабаев ауданында орын алған. Мамандар “ПТЭЦ-2-Булаево-нефть” бағытындағы ВЛ-110кВ желісін жөндеуге жұмылдырылған.
– Маңызды әлеуметтік нысандар бірінші кезекте резервтік қуатпен қамтамасыз етілді. Электр қуаты бірте-бірте қалпына келтірілуде. Қатты боран салдарынан электр желілері үзіліп, кейбір жерлерде тіректер құлаған. Салдарынан аудан толығымен электр қуатынсыз қалды. Бұл жағдай біздің бақылауымызда. Барлық елді мекеннің жарықпен қамтамасыз етілуін қадағалайтын боламыз, – деді облыстық энергетика және ТКШ басқармасы басшысының міндетін атқарушы Владислав Лукин.
Қалпына келтіру жұмысы жүргізіліп жатқанымен облыстың бірнеше ауданында әлі де болса жарықсыз қалған елді мекендер бар. Бес тәуліктен бері тас қараңғыда отырған тұрғындарға жарық қашан берілетіні белгісіз.
Ауылдарды электр қуатымен қамтамасыз ету мәселесін облыс басшысы Ғауез Нұрмұхамбетов депутаттар алдында берген есебінде атап өтті.
– Барлық қызметтерді біріктірген арнайы штаб жұмыс істеуде. Әлеуметтік нысандар бақылауға алынып, үздіксіз жылу беру үшін қосымша электр көзімен қамтылды. Мағжан Жұмабаев ауданы жарықсыз қалып, ондағы ауылдарды уақытша Ресей арқылы және Ақмола облысынан электр қуатымен қамтамасыз еттік. Қазір “Севказэнерго” және “Көкшетау энерго” кәсіпорындарының жөндеу бригадалары өңірдегі 40 ауылда жұмыс жүргізуде. Бұл мәселе жеке бақылауымда, – деді облыс басшысы.
Жасыратын жоқ, өңірдегі электр желісінің 90 пайызы тозған. Ескі дүниені қанша жамап-жасқағанмен, ұзаққа шыдамасы белгілі. Облысымызда электр қуатының тапшылығы бүгін пайда болған өзекті мәселе емес. Мұндай жағдай соңғы уақытта жиі қайталануда.
Ләзиза МЫРЗАНТАЙҚЫЗЫ,
“Soltüstık Qazaqstan”.